پاۆلودارداعى لەنين كەنتى ەندى اتامەكەن دەپ اتالاتىن بولادى، دەپ حابارلايدى “ادىرنا” ۇلتتىق پورتالى.
Pavlodarnews.kz جازۋىنشا، كەنت تۇرعىندارى وسى اتاۋدى تاڭداعان. پاۆلودار قالاسىنا قاراستى لەنين كەنتىنىڭ مادەنيەت ۇيىندە كەنت اتاۋىن وزگەرتۋ بويىنشا قوعامدىق تىڭداۋ ءوتتى. كەنت اكىمى مارجان الشىمباەۆانىڭ ايتۋىنشا، توقسان سايىن تۇرعىندارمەن كەزدەسۋ ءوتىپ تۇرادى. سول كەزدەسۋلەردە كەنتتىڭ اتاۋىن وزگەرتۋ تۋرالى ءوتىنىش ءجيى ءتۇسىپ تۇرعان.
بيىل بىرقاتار تۇرعىنداردان قالا اكىمى مەن وبلىس اكىمىنە كەنتتىڭ اتاۋىن وزگەرتۋ تۋرالى ءوتىنىش تۇسكەن. سودان كەيىن 1 اي بۇرىن وبلىستىق گازەتتەردە 29 ساۋىردە قوعامدىق تىڭداۋ وتەتىنى تۋرالى حابارلاما تاراتىلعان.
«وعان دەيىن جەرگىلىكتى تۇرعىندارمەن جيىندار ءوتتى. اقپاراتتاندىردىق. توپتار قۇرىلدى. كوپ ۇسىنىس ءتۇستى. 20-عا جۋىق اتاۋ ۇسىنىلدى. دەگەنمەن جەرگىلىكتى تۇرعىندارمەن وتكەن جيىنداردا 7 ۇسىنىس ىرىكتەلدى. وعان قازانعاپ، بيدايىق، اتامەكەن، ىنتىماق، قازىنا، جەتىنشى اۋىل اتاۋلارى جانە اتاۋدى وزگەرتپەۋ نۇسقاسى كىردى. ودان كەيىن بۇگىنگى قورىتىندى جيىندا ەكى اتاۋ: قازانعاپ بي جانە اتامەكەندى قاراستىرۋ تۋرالى شەشىم قابىلداندى», – دەدى مارجان الشىمباەۆا.
قوعامدىق تىڭداۋعا كەنت تۇرعىندارى، جەرگىلىكتى قوعامداستىق مۇشەلەرى، جاقىن اۋىلدارداعى جانە قالاداعى اۋىلدىڭ تۋمالارى، اۋىلعا قاتىسى جوق ادامدار دا كەلدى. جينالعانداردىڭ پىكىرى تىڭدالدى. الايدا شەشىمدى جەرگىلىكتى قوعامداستىق مۇشەلەرى شىعاردى.
داۋىس بەرۋگە جەرگىلىكتى قوعامداستىقتىڭ 50 مۇشەسى قاتىسىپ، 49 ادام اتامەكەن اتاۋىنا داۋىس بەردى. ەندى زاڭناما بويىنشا اتاۋدى وزگەرتۋ جۇمىسىنا 3-6 اي ۋاقىت جۇمسالادى.
