Balalary ıstı bolǧannan keiın qoǧam deputattardyŋ mandatyn kerı qaitarudy sūraidy. Alaida zaŋ şyǧaru organyndaǧy olardyŋ ärıptesterı mäselenı jeke jauapkerşılıkpen bailanystyrady.
DAUDYŊ BASY – DAIRABAEVTYŊ EKI ŪLY
Mäjılıstegı «Auyl» partiiasy fraksiiasynyŋ deputaty Jiguli Dairabaevtyŋ qos ūly 6 säuır künı sottaldy. Taraz qalalyq №2 soty subsidiiaǧa bölıngen qarjyny jymqyryp, memleketke 550 mln teŋge ziian keltırgenı üşın Marat Dairabaev pen Didar Moldaqalyqty 5 jylǧa şartty türde bostandyǧynan şektedı. Būdan özge taǧy da ekı adam türme jazasyna kesıldı.
Jiguli Dairabaev 2022 jyly kezekten tys prezidenttık sailauǧa kandidat bolǧan kezde balalarynyŋ mäselesı aldynan şyqqan. Alaida ol balalarynyŋ «jas emes» ekenın aityp, «öz mäselelerın özderı şeşedı» degen.
Al qoǧamda osyndai jaǧdaidan keiın onyŋ deputat boluyna moraldyq haqysy joq degen pıkır jiı aitylǧan.
Balalary auyl şaruaşylyǧyna bölgen qarjyny jymqyryp, özı «auyldyŋ örkendeuı» üşın jūmys ısteitın partiianyŋ atynan sailanǧan deputattyŋ özı sot şeşımınen keiın būl mäselege tıke jauap bergen joq. Tılşıler közıne de tüspedı. Onyŋ ornyna partiialas ärıptesı Anas Baqqojaevtyŋ jauap beruıne tura kelgen. Aituynşa, būl ıske Dairabaevtyŋ tük qatysy joq.
«Bırınşıden, deputattyŋ mınsız bedelı turaly bızde zaŋ da, norma da joq. Ekınşıden, Jiguli Dairabaev auyl şaruaşylyǧyn, öndırıstı jaqsy bıledı. Sondyqtan da ol kısı fraksiiaǧa qajet. Ol deputattyq mandatyn tapsyrmaidy", - degen «Auyl» partiiasy fraksiiasynyŋ jetekşısı, deputat Anas Baqqojaev.
KÖŞEDEN RİNG IZDEGEN KIŞI TŪRLYHANOV
Biyl Mäjılıske bır mandatty okrugten sailanǧan «Amanat» partiiasyna müşe deputattyŋ ūly äkesı sailauǧa tüser-tüspeste şu şyǧardy. Ol belgılı baluan Däulet Tūrlyhanovtyŋ ūly – Nūrasyl Tūrlyhanov. Ol Almatyda öz süiıktısımen tılge kelıp qalsa kerek. Janjal kezınde oǧan araşa bolǧan taǧy ekı adamdy soqqy astyna alǧan Nūrasyl Bolattyŋ ısı sotqa jöneltıldı. Būzaqylyǧy üşın ol ekı myŋ AEK mölşerınde aiyppūl töleuı, 600 täulıkke deiın qoǧamdyq jūmysqa tartyluy nemese ekı jylǧa bas bostandyǧynan aiyryluy mümkın.
Däulet Tūrlyhanov «būzyq balasynyŋ» qylyǧyn moiyndap, ündemei qalmady. Balasy kınälı dep tanylsa, jazasyn alu keregın aitty. Tıptı, mandatyn tapsyrǧysy kelgenın de jasyrmady. Alaida, būl şeşımge otbasy, dostary men tuystary qarsy bolǧan körınedı.
Ol ūlynyŋ qolynan zardap şekken adamdarmen de kezdesken.
«Oqiǧadan soŋ ata-ana retınde olarmen kezdesıp, keşırım sūradym. Em alsyn dep kömek ūsyndym, bıraq olar bas tartty» , - degen Däulet Tūrlyhanov.
Osylaişa, bırınıŋ bır ūly, ekınşısınıŋ ekı ūly qatar qoǧam synyna ılıkken deputattar mandattaryn tapsyrmady.
BALASYNYŊ QYLYǦYNA ŞYDAMAI QYZMETTEN KETKENDER
2015 jyly Astanada ūlynyŋ üilenu toiyndaǧy kortejı jolda jüru erejesın būzǧany üşın IIM Äkımşylyk polisiiasy komitetınıŋ basşysynyŋ orynbasary Baqytjan Baltaşev qyzmetınen ketken edı. Balasy qymbat kölıktermen elorda köşelerınde şou ūiymdastyrǧan polisiia polkovnigı IIM būiryǧymen ornyn bosatqan.
Odan bölek, däl sol 2015 jyly Astananyŋ sauda oiyn-sauyq keşenderınıŋ bırınıŋ kinoteatrynda satuşy qyzdy tepken Quanyş Turageldievtıŋ äkesı Bolat Turageldiev Qazaqstan premer-ministrı keŋsesındegı qyzmetınen ketu turaly aryz berdı. Qazaqstan premer-ministrı keŋsesınıŋ bas inspektory qyzmetın atqarǧan Bolat Turageldiev qoǧamnyŋ būl ıske narazy bolǧanyna nazar audaryp, özınıŋ moraldyq-etikalyq ūstanymyna bailanysty qyzmetınen kettı.
«SAILAU NÄTİJESINE NARAZYLYQTYŊ JALǦASY»
Mäjılıs deputaty Ermūrat Bapidıŋ aituynşa, mūndai oqiǧalar – «qotyraş qoǧamnyŋ» problemasy.
«Būl şuly jaǧdai Dairabaev pen Tūrlyhanovtyŋ ǧana problemasy emes. Būl - bızdıŋ «qotyraş qoǧamnyŋ» täuelsızdıkpen bırge kelgen problemasy. Soŋǧy 20-25 jyldyŋ kölemınde ūrpaq tärbiesınen būryn, ışıp-jeu, talan-taraj, qanaǧatsyzdyq, ūrlyq siiaqty merezdık betımen kettı. Jiguli Dairabaev pen Däulet Tūrlyhanovtyŋ balalaryna qatysty jaǧdai, dau-damai soŋǧy parlamenttık sailauǧa qatysty narazylyqtyŋ jalǧasy dep oilaimyn. Jalpy, ekı deputattyŋ balalaryna qatysty mäselege sot törelık aituy tiıs. Mıne, osydan keiın, Dairabaev pen Tūrlyhanovtyŋ joǧary qyzmette qaluyna moraldyq negızdıŋ bar-joǧyn atalǧan azamattardyŋ özderı şeşuı kerek», - dedı ol.
«JALPYǦA BIRDEI MORALDYQ ŪSTANYM QAJET»
Al taǧy bır deputat Abzal Qūspan da mandat ötkızu-ötkızbeu är deputattyŋ öz jauapkerşılıgıne bailanysty degen pıkırde.
«Zaŋ boiynşa kämelettık jasqa tolǧan azamattar üşın ata-anasy, tuystary jauap bermeidı. Degenmen, moraldyq tūrǧyda keletın bolsaq, bızde onyŋ qandai da bır standarttary jäne barlyǧy moiyndaityn, jalpyǧa bırdei qūndylyq joq. Sondyqtan būl oqiǧany är azamattyŋ qabyldauyna bailanysty. Däl qazır Jiguli Dairabaev pen Däulet Tūrlyhanovqa syn arta almaimyz. Būl tek olardyŋ ǧana mäselesı emes, jalpy qoǧamdaǧy problemadan tuyndap otyr. Aldymen, barlyǧymyzǧa bırdei moraldyq ūstanym qalyptastyruymyz qajet», - deidı Abzal Qūspan.
«MEN HALYQ KÖZINE KÖRINBES EM...»
Saiasattanuşy Dos Köşım de deputtardyŋ qylyǧyn olardyŋ ūiatyna tapsyrdy. Degenmen ol mäselenıŋ törkını moralmen, jeke tärbiemen bailanysty ekenın joqqa şyǧarmaidy.
«Menıŋşe, būl olardyŋ tärbiesıne bailanysty. Olardyŋ moraldı qūqyqty, moraldı talapty qalai bıluınde, qalai qabyldauynda. Qysqasy, tüsınıgınde. Däulet Tūrlyhanov pen Jiguli Dairabaevtyŋ balalarynyŋ ıstegen qylmysy, ekeuı de tärbiege bailanysty qylmysqa jatady. Eger men olardyŋ ornynda bolsam, halyq közıne körınetın eşqandai orynǧa barmauǧa tyrysar edım. Sebebı, kınä menen, tärbiemnıŋ dūrys bolmaǧanyna tıkelei bailanysty», - dedı saiasatker Dos Köşım.
Partiia atynan deputat bolǧandardyŋ mandatyn qaitarudy ädette partiiasy şeşedı. Al zaŋ boiynşa bır mandatty aumaqtyq sailau okrugı boiynşa deputattyŋ mandatyn kerı qaitaryp aluǧa sailauşylardyŋ senımın joǧaltu jäne sailau aldy baǧdarlamasyn oryndamauy negız bola alady eken.
Dana NŪRMŪHANBET
”Adyrna” ūlttyq portaly
