Májilis tóraǵasy Erlan Qoshanov sý jańa depýtat Ardaq Nazarovtyń áreketine jaýap berdi, dep habarlaıdy Adyrna.kz ulttyq portaly.
– Erlan Jaqanuly depýtattar jumysyna kirispeı jatyp «óner» shyǵaryp jatyr. Naqtyraq aıtsam, keshe Ardaq Nazarov Ortalyq saılaý komıssııasynyń aldynda jáne búgin Májiliste jýrnalısterdiń suraǵyna ádeıi jaýap bermeı ketti. Májilistiń janyndaǵy ádep komıssııasynda jýrnalısterdiń suraǵyna jaýap bermeıtin depýtattardyń máselesi qarala ma?
– Biz áli ádep keńesin qurǵan joqpyz. Biraq biz meılinshe ashyq bolýǵa tyrsamyz. Búgin depýtattardyń birinshi jańa otyrysy boldy ǵoı. Árıne, men Parlament spıkeri retinde jáne ózge de basshylar depýtattarmen jumys júrgizip, jýrnalısterge baılanysty talapty jetkizemiz. Buǵan deıingi jetinshi shaqyrylymda ondaı oqıǵalar boldy dep men aıta almaımyn. Solaı ǵoı!? Sondyqtan, biz de ony qaıtalamaýǵa tyrysamyz. Árıne, jýrnalıstermen kezdesý, sizderge suhbat berý – birinshi kezekte bizdiń múddemiz. Sebebi sizder arqyly halyqqa jasap jatqan jumysymyzdy jetkizý – bizge qajet.
– Jeke ózińizdiń tarapyńyzdan Ardaq Nazarovqa eskertý bola ma?
– Ardaq Nazarov bizdiń reglamentti buzatyn bolsa, árıne, eskertý beriledi.
– Jýrnalısterdiń suraǵyna ádeıi jaýap bermeıtin bolsa. zańda qandaı tetik kórsetilgen? Mysaly depýtattyq mandattan aıyrý máselesi qarastyryla ma?
– Jýrnalısterdiń suraǵyna jaýap bermegen eken dep, depýtattyq mandatynan aıyrý degen zańda qarastyrylmaǵan. Depýtat ózi quqyly – jaýap bere me, joq pa? Biraq jaýap berýi qajet.
– Eger jýrnalıstiń suraǵyna jaýap bermese nege depýtat boldy?
– Meniń oıymsha, bul sheshilmeıtin másele emes.
P.S. Keshe Ardaq Nazarov Astanada depýtattyq mandatyn alýǵa barǵanda jýrnalısterdiń suraǵyna elemeı, Qańtar jaıly suraqqa «Alla barshańyzdy aman etsin» dep jaýap bergen. Jańa depýtattyń bul áreketi áleýmettik jelide qyzý talqylanyp jatyr. Al parlament palatalarynyń birlesken otyrysynda búgin Nazarov tipten eshbir suraqqa jaýap bermeı kete bardy.
Serik Joldasbaı
