Tolassyz jaýǵan jańbyr men erigen qar sýynyń soıqanynan sekem alǵan turǵyndar baspanalaryn tasqap qashqan. Aýyl azamattary amaldyń joqtyǵynan qoldan jasalǵan jol súrleýimen júrip-turýǵa májbúr. Qyzyl sý, tipti, úılerge kirgen.
Tasqyn sýdyń betalysyn barlap, barysyn aýdan ákiminiń orynbasary baıandady:
- Jaǵdaıdy qalypqa keltirýge aýdandyq TJB mamandary men áskerılerdi qosa alǵanda 30 adam jáne 8 tehnıka jumyldyrylǵan. Biraq, bul 30 myńnan astam halqy bar Uzynaǵashty qyzyl sýdan aryltýǵa jetkiliksiz. «Sondyqtan baspanalary men aýlalaryn sý shaıǵan turǵyndar taǵy birneshe kún kútýi kerek», - dedi aýdan ákiminiń orynbasary.
Onyń birneshe sebebi bar. Tehnıka tizgindegen jaýapty mamandar taýdan aýylǵa qaraı jylǵalanyp aqqan sýdyń baǵytyn burýmen áýrelenip jatyr.
qazaqstan.tv-diń habarlaýynsha, Uzynaǵashta aǵyndy sýǵa arnalǵan 30-dan astam aryq bar. Aryqtardyń deni kúl-qoqyspen bitelip qalǵan. Qazir 5 nasospen aýyldaǵy sýdy sorǵyzý jumystary júrip jatyr. Turǵyndarǵa kelgen shyǵyn áli eseptelmegen, al zardap shekkenderdiń múlki ótele, ótelmeı me ol jaǵy da ázirge belgisiz.
"Adyrna" ulttyq portaly