QR Parlamenti Májilisi depýtattyǵyna kandıdat Arman Shoraev Qazaq eline úndeý tastap, bir mandatty okrýgterden saılanǵaly jatqan táýelsiz depýtattardy qoldaýǵa shaqyrdy, dep jazady "Adyrna" ulttyq portaly.
"Qurmetti aǵaıyndar! Týra 1 aıdan keıin bizdiń elimizde saılaý ótedi. Eger sizderge 5 mınýtta Astanamyzdy Nur-Sultan dep ózgertetin mylqaý depýtattar ári qaraı kerek bolsa, 2 jyldan keıin 2-3 mınýtta Nur-Sultandy qaıtadan Astana dep ózgertetin, ıaǵnı bıliktiń ǵana talabyn oryndaıtyn dál sol depýtattar qajet deseńizder, onda saılaýǵa qatyspańyzdar. Biraq, osy joly bizdiń elimizde erekshe saılaý bolaıyn dep jatyr. Óıtkeni, 98 depýtattyń 29-y bir mandattyq okrýg arqyly bizdiń Májilisimizge saılanady. Ol degenimiz "Men" deı alatyn, namysyn nanǵa aıyrbastamaıtyn, bılikke baǵynbaıtyn azamattar qatysady degen sóz. Almatydan, Astanadan, Aqtóbeden, basqa da oblys ortalyǵynan qatysyp ta jatyr. Meniń ótinishim, eger sizder mylqaý Parlamentti qajet etpeseńizder... Sońǵy 10 jylda men bizdiń Parlamentimizdi "Sender qýyrshaq teatrsyńdar, qarııalar úıisińder" dep talaı ret synaǵanmyn. Shynymen dál solaı boldy. Ol jerde birde-bir azamat bolǵan joq. Bılikke táýeldi azamattar otyrdy. Mysaly, qazir saılaýaldy baǵdarlamany jazaıyn desem. Shynymen bizdiń elimizde saý jer joq. Búkil júıe, búkil salada ózgeris qajet. Ol ózgeristi táýelsiz depýtattar arqyly ǵana júzege asyrýǵa bolady. Ony umytpańyzdar. Qurmetti aǵaıyn! "Men barmaımyn. Bılik ózinikin isteıdi. Meniń daýsymdy urlap alady. Barǵanym ne, barmaǵanym ne... Eshteńe ózgermeıdi" dep oılaı berseńizder, shynymen eshteńe ózgermeıdi. Sondyqtan 5 jylda 1 ret qana bolatyn múmkinshilikti paıdalanyńyzdar",- dedi Shoraev.
"Adyrna" ulttyq portaly
