Ekonomikalyq yntymaqtastyq jäne damu ūiymy oqytu men bılım beru salasyndaǧy halyqaralyq TALIS-2024 zertteuınıŋ nätijelerın jariialady. Zertteu qorytyndysy Qazaqstandaǧy bılım beru jüiesındegı oŋ özgerısterdı, onyŋ ışınde pedagogterdı qoldauǧa jäne bılım sapasyn arttyruǧa baǧyttalǧan şaralar men «Pedagog märtebesı turaly» zaŋnyŋ tiımdılıgın körsettı.
TALIS zertteuı bılım beru ortasyn, pedagogterdıŋ eŋbek jaǧdailaryn, käsıbi damu mümkındıkterın, oqytu täjıribesı men käsıbi ūstanymdaryn baǧalaidy. Zertteuge 7 myŋnan astam qazaqstandyq pedagog pen 369 mektep direktory qatysty.
«TALIS – oqu ortasyn jäne mūǧalımderdıŋ eŋbek jaǧdailaryn jaqsartuǧa baǧyttalǧan auqymdy halyqaralyq zertteu. 2018 jylmen salystyrǧanda qazaqstandyq pedagogterdı äkımşılık jūmystarǧa tartu azaiyp, olar sabaq beruge jäne ata-analarmen, qamqorşylarmen bailanysqa köbırek uaqyt böle bastaǧan. Sondai-aq mamandyǧyna jäne eŋbek jaǧdaiyna qanaǧattanu deŋgeiı edäuır artqan», – dep atap öttı Oqu-aǧartu ministrı Jūldyz Süleimenova.
Odan bölek, zertteu nätijelerı pedagogterdıŋ eŋbek jaǧdaiynda aitarlyqtai oŋ özgerıster bolǧanyn körsetedı. Ötken oqu jylynda qazaqstandyq pedagogterdıŋ ortaşa aptalyq jüktemesı 36 saǧatty qūrady. Al 2018 jyly būl körsetkış 50 saǧat bolǧan. Mūndai qysqartu – EYDŪ elderınıŋ ışınde erekşe jaǧdai.
Sondai-aq pedagogterdıŋ ortaşa jasy 41 jasty qūrady, būl EYDŪ elderınıŋ ortaşa deŋgeiınen 4 jasqa tömen. Sonymen qatar, joǧary oqu ornynan keiıngı bılımı bar pedagogterdıŋ ülesı de artqan. Magistr därejesı bar mamandardyŋ ülesı 3,5 %-dan 11 %-ǧa deiın, al doktor därejesı barlar 0,1 %-dan 0,6 %-ǧa deiın ösken.
Maŋyzdy nätijelerdıŋ taǧy bırı — pedagogterdıŋ eŋbek jaǧdailaryna jäne jalaqysyna qanaǧattanuşylyq deŋgeiınıŋ köterıluı. Saualnama nätijelerı boiynşa pedagogterdıŋ 95 %-y öz jūmysyna qanaǧattanatynyn, al 80 %-y mamandyqty qaita taŋdau mümkındıgı bolsa, qaitadan mūǧalım boludy qalaitynyn aitqan.
