Respublica saıası partııasy barlyq 17 oblysta jáne respýblıkalyq mańyzy bar 3 qalada fılıaldary men ókildikterin tirkeýdiń barlyq qajetti rásimderin aıaqtady.
Buryn atap ótilgendeı, Qazaqstandaǵy barlyq saıası partııalar memlekettik tirkelgen kúnnen bastap 12 aı ishinde óziniń qurylymdyq bólimshelerin (fılıaldar men ókildikterdi) tirkeýi tıis.
Respublica partııasynyń tóraǵasy Aıdarbek Hodjanazarov endigi kezekte oblystyq shtabtar ashylatynyn aıtty.
«Qazir bizge elimizdiń túkpir-túkpirinen otandastarmyz Respublica partııasynyń quramyna qosylǵysy keletini týraly júzdegen habarlamalar joldap jatyr. Biz adamdardyń osyndaı qyzyǵýshylyq tanytqanyna óte qýanyshtymyz! Kelesi kezekte oblystyq shtabtar ashylady. Ol mekemelerde turǵyndar keńes alyp, ózderin qyzyqtyratyn suraqtaryn qoıyp, usynys-pikirlerin aıtyp, shtab ókilderimen áńgimelesip, eń bastysy partııa qataryna qosyla alady. Biz áleýmettik jelilerde barlyq shtabtardyń baılanys nómirleri men mekenjaılaryn jarııalaıtyn bolamyz. Shtab jumysynyń alǵashqy kúnderinen bastap partııamyzǵa múshe bolǵysy keletinderdiń barlyǵyn shaqyra alamyz dep senemiz», - dedi ol áleýmettik jelidegi paraqshasynda.
Eske salaıyq, Respublica partııasy aldaǵy kezekten tys Qazaqstan Respýblıkasy Parlamenti Májilisiniń de, máslıhattardyń da depýtattarynyń saılaýyna qatysady. Qazirgi ýaqytta partııanyń shtaby saılaýaldy baǵdarlamasyn tanystyrýǵa jáne saılaýaldy naýqandy júzege asyrýǵa daıyndyq ústinde.
Partııanyń basty maqsattarynyń biri – bıliktiń ashyqtyǵyna qol jetkizý, onyń básekege qabilettiligin qamtamasyz etý, azamattardyń saıasatqa yqpal etý tetikteri men múmkindikterin usyný.
