Qazaq halqynyń ult bolyp qalyptasý kezeńinen bastap ónerden kem de bolmaǵan. Ónerdiń qaı túrin alsańyzda qazaq halqynyń boıynan tabylyp keledi.
Eń alǵash aǵash pen súıekten oıýlap turmystyq zattar jasaý, beıneleý óneri, keıingi kezeńderde shabytty poezııamen, oryndy sheshendikpen, jalyndy kúıler jáne shyn júrekten shyqqan ándermen ómir súrgen. Iaǵnı, sazdy áýenmen qazaqtyń búkil ómiri baılanysty bolǵan desekte bolady. Bertin kele sporttyń san túri, sahna óneriniń qyr-syryn meńgerip, álemdik dodalarda báıge bermeı kele jatqan talanttar barshylyq. Qazirgi jahandaný úderisi shapshań júrip jatqan ýaqytta ulttyq tárbıe, ulttyq rýhty joǵaltpaý – úlken mindet ekeni bárimizge aıan. Ulttyq bolmys pen ónerdi baılanystyryp, kásibılikke jetkize bilý bul talantty jandardyń úlken eńbekteriniń arqasynda ekenin moıyndap kelemiz. Jáne de bolashaqta ulttyń tabysty bolýy onyń tabıǵı baılyǵymen emes, adamdarynyń básekelik qabiletimen aıqyndalady. Sonyń ishinde jastar – kez kelgen qoǵamnyń bolashaǵy men qozǵaýshy kúshi.
Memlekettiń turaqty damýynyń negizi – básekege qabiletti jastar býyny, al bul tikeleı jas qazaqstandyqtardyń bilim men bilik sapasyna, olardyń umtylysy men yntasyna baılanysty. Táýelsiz Qazaqstannyń erkin ósken urpaqtarynyń túrli salada bıik tuǵyrynan kórinip, kók týymyzdy jelbiretip júrgeni óte qýantarlyq jaǵdaı. Elimizde bilim, óner, sport jáne basqa da mańyzdy salalar boıynsha shoq juldyzdar jarqyrap keledi. Sondaı-aq, kıno áleminde de kásibılikke jetip, dúnıejúzilik júldelerge ıe bolyp júrgen rejısserlerde barshylyq. Solardyń biri Qazaqtyń mańdaıyna bitken shoq juldyzy, daryndy rejısser Sháken Aımanov atamyzdyń kásibin tańdap, izin jalǵastyrýshy talantty qazaqtyń qarshadaı qyzy Dıana Amangeldiqyzy.
Qýanysh Dıana Amangeldiqyzy Almaty qalasynda týyp-ósken. Qalamyzdaǵy tereń oıly, ozyq oqýshylardy oqytatyn «Zerde» gımnazııasyn 11 jyl oqyp, AQSh-taǵy álemge áıgili New York Film Academy-ǵa oqýǵa túsedi. Tórt jyl bilim ordasynda úzdik oqyp, kınorejısser mamandyǵy boıynsha dıplomyn sátti qorǵap shyqty. Jas rejısser óziniń dıplomdyq jumysyna arnalǵan «Tal túbindegi kezdesý» atty qysqa metrajdy fılmin týǵan elinde túsirgen. Týyndyda óz ata-anasynyń tanysý hıkaıasyn baıandaı otyryp, toqsanynshy jyldardaǵy ómir súrý saltyn, kıiný stılderin, adamdardyń ómirge degen kózqarasyn, bolashaqqa degen armandaryn aıqyn beıneleı otyryp, eki jastyń móldir mahabbatyn kórsete bildi. Mahabbattyń qanshalyqty qudiretti sezim ekenin jáne de bir kórgennen ǵashyq bolý, eki jas bir-birine senim bildirý arqyly úlken qarym-qatynas qura alatynyn beınelegen. Shynaıy ómir jelisimen túsirilgen taspada Dıana qyzdyń es bilgeli ata-anasynyń aralaryndaǵy tátti sezimderine, shynaıy súıispenshiligine jáne bir-birine degen zor qurmetine kýá bolyp óskeni baıqalady. Bundaı otbasydan týyp-ósken balalar da óte meıirimdi, aınalasyna qomqor, armanyna qol jetkize alatyn tulǵa bolyp ósetini anyq. Mine, oǵan dálel Dıana Amanqyzy. Bala kezden armany New York Film Academy tálim alyp, eliniń damýyna onyń ishinde kıno álemine óz úlesin qosý eken. Qazaqta «Bolatyn balanyń betin qaqpa, belin bý!» dep beker aıtpasa kerek. Jas urpaqtyń armanyna qanat bitirip, senimderine selkeý túsirmeı, qoldap jiberse bolǵany, ala almaıtyn qamaly bolmas. Ultymyzdyń erteńgi bolashaǵy osyndaı talanttardyń bıikke umtylýynan bastalatynyn umytpaıyq.
