Taıaýda 16 jastaǵy ulynan qapyda aıyrylyp qalǵan aıtysker aqyn Serikzat Dúısenǵazy barsha halyqqa alǵysyn aıtty, dep habarlaıdy «Adyrna» tilshisi.
«Kútpegen oqys jaǵdaıdan esti endi ǵana jıyp otyrǵan jaıym bar. Mundaı aýyr synaqty Alla eshkimniń basyna bermesin. Qaıǵyrǵanǵa basý aıtyp, qamyqqanǵa aqyl aıtyp júrgen adam bolsam da júrekke jazylmas syzat tústi. Endi onyń emi tek Allanyń týra joly, Islamnyń ıman baılyǵy ǵana bolar. Taǵdyrǵa ıman keltirgen musylmanbyz ǵoı. Bergenine shúkirlik qylǵan Allaǵa alǵanyna kúpirlik qylmaımyz.
Aldymen osy eń qıyn sátimde qulynshaǵymnyń qaıǵysyn bólisken barsha qazaq halqyna perzenttik hám ákelik alǵysymdy aıtamyn. Tóbesine kótergen qara orman halqym bolmasa eshkim emes ekenimdi bilemin. Alla jazsa, endi qalǵan ǵumyrymda qazaǵymnyń keleshegi úshin qyzmet etip ótermin.
Men Prezıdent Qasym-Jomart Kemelulymen kezdesip sóılesken adam emespin. Basyma qaıǵy túskende ony Memleket basshysynyń bóliskenin azamattyq dep sanaımyn. Áli ómirdiń úlken esigin ashyp úlgermegen perishte balam úshin menimen birge qaıǵyryp, kóńil aıtý hattaryn joldaǵan Prezıdent ákimshiligine, Úkimet múshelerine, depýttattarǵa, oblys ákimderine, rektorlarǵa, aqparat quraldarynyń basshylaryna, Bas múftı bastaǵan din qyzmetkerlerine rahmetimdi aıtamyn. Tilek-nıetterińiz Qudaıdan qaıtsyn!»—dedi ol.
Fılologııa ǵylymdarynyń kandıdaty jalǵyz ulynyń tárbıesine erekshe kóńil bólgenin atap ótti.
«Jalǵyz ulym bolǵan soń marqum Álıhanymnyń boıyna er azamatqa tán barlyq qasıetterdi sińirip ósirýge tyrystym. Ózim qandaı da bir jaqsy ortaǵa barsam ertip aparyp kórsetip júretinmin. Ekeýmiz qolymyz bos ýaqytta atqa minip, balyq aýlaıtynbyz. Jazdy kúnderi taýǵa shyǵyp, kólge shomylsaq, qysty kúnderi konkı men shańǵy tebetinbiz. Kishkentaı kúninen qalaǵan kitaptaryn satyp áperip bilimdi bolýǵa tárbıeledik. Qazaqtyń halyq ertegilerinen, balalar ádebıetiniń ozyq úlgilerinen, tanymdyq enıklopedııalardan óziniń jeke kitaphanasyn jasaqtadyq. Qurannyń álippesin tanytý úshin eki jyl «Áziret Sultan» meshitiniń jazǵy ımandylyq kýrstarynda oqyttym. Nátıjesi jaman bolǵan joq. Jetinshi synypqa deıin №48 mektep-lıeıde bilim aldy. Jetinshi synypta №9 «Zerde» daryndy balalar mektebine qabyldandy. Sol mekteptiń myqty ustazdarynyń arqasynda boıyndaǵy ǵalymdyq qabileti ashyldy. Fızıka, ınformatıka, robototehnıka salalary boıynsha ótken qalalyq, respýblıkalyq, halyqaralyq olımpıadalar men ǵylymı jobalardyń jıyrmadan asa saıysynda olja saldy. Joǵary matematıka men fızıkany jaqsy meńgerdi. Tipti, onyń jasaǵan ónertapqyshtyq jobalaryn ótken jazda «Qazaqstan» ulttyq arnasy túsirip, efırden kórsetkenin endi ǵana bilip otyrmyn. Maǵan ol týraly ózi aıtqan joq. Maqtanǵandy unatpaıtyn. Armany Nıkola Tesla sııaqty ınjener-ónertapqysh ǵalym bolý edi. Aldaǵy aqpan aıynda jıyrma úsh memleket qatysatyn halyqaralyq «Jáýtikov» olımpıadasynyń oqý-jattyǵý daıyndyǵynan tolyq ótken-tuǵyn. Endi medal ákeledi dep kútip júrgende osyndaı jaǵdaıǵa dýshar boldyq.
Álıhanymnyń táp-táýir aqyn bolǵanyn da ótkende ustazdary jibergen óleńderinen tanydym. Burynyraqta balań óleńder jazyp júrgenin biletinmin. Óleńdi qazaqsha da, oryssha da jazatyn. Ásirese, orys tili muǵalimi jibergen keıingi óleńderinen qalyptasqan aqynnyń qoltańbasyn kórip ań-tań bolyp otyrmyn. Ol óleńderdi keıinirek osy jelige salamyn»,—dedi Serikzat Dúısenǵazy.
Aıtýynsha, 16 jastaǵy Álıhannyń qazasyndaǵy keıbir tustar áli kúńgirtteý bolyp tur.
«Ol shańǵyny óte jaqsy tebetin. Aǵashqa qandaı jaǵdaıda soǵylǵany beımálim. Sol sońǵy ret taýǵa kóterilip bara jatqanyn anasy túsirgen vıdeo bar. Ary qaraı ne bolǵanyn biz bilmeımiz. «Elikti» shańǵy bazasynyń qyzmetkerleri bir jarym saǵattaı qulaǵan balany taýdan tómenge túsirmeı, alǵashqy medıınalyq kómek kórsetpeı tyǵyp ustaǵany kókeıge kúdik uıalatady. Sondyqtan oqıǵa bolǵan sátti kórgen kýágerlerdi izdep jatqanymyz ras. Iá, balamyz endi qaıtyp oralmas. Biraq basqa adamdar da bizdiń kúıimizdi keshpese eken dep alańdaımyz. Sebebi, shańǵy bazasynda eshqandaı tehnıkalyq qaýipsizdik saqtalmaǵan. Myńdaǵan adam syrǵanap jatqan jerde alǵashqy kómek kórsetetin dárigerleri de joq. Ol bylaı tursyn, balasyn joǵaltyp shyryldaǵan ata-anaǵa eshkim jaýap bermeı, bir-birine siltegenin qalaı túsinemiz? Sol «Elikti» eshteńe bolmaǵandaı áli jumys istep turǵan kórinedi. Bizdiń elde adamnyń quny joq ekeni, eshkim eshteńege jaýapty emes ekeni osydan-aq bilinbeı me? Sondyqtan bizdiń memlekettik organdar osyndaı demalys oryndarynyń tehnıkalyq qaýipsizdigin tekserý kerek dep sanaımyn. Ony buqaralyq aqparat quraldary túsirip, halyqqa jarııalaý kerek. Onsyz da at tóbelindeı az qazaqpyz. Qyryp tastaı beretin artyq adam joq bizde! Alla Taǵala qara orman qazaǵymdy aman qylsyn! Kishkentaı Álıhanymnyń jetpegen uly armanyna jetetin urpaq kóp bolýyn tileımin!»—dedi aqyn.
