Qaraǵandy qalasynda 16 qabatty turǵyn úıde gaz jaryldy. Qazir adamdardy qutqarý jáne evakýaııalaý júrip jatyr. Bul týraly Tótenshe jaǵdaılar mınıstrligi málimdedi, dep habarlaıdy “Adyrna” ulttyq portaly.
Málimet boıynsha, kezekshilik bólimine 10 qańtar kúni saǵat 21:29-da Respýblıka dańǵyly, 18/2 mekenjaıynda órt bolyp jatqany týraly habar túsken. 16 qabatty, 127-páterli turǵyn úıdiń 8-qabatynda jarylys bolyp, órt shyqqan.
«Oqıǵa ornyn tekserý barysynda úsh adamnyń denesi tabylǵan. Boljam boıynsha olar eki er adam men bir áıel ekeni anyqtaldy. TJD kúshteriniń kómegimen 11 adam qutqaryldy, onyń ishinde 2 bala bar», – delingen habarlamada.
Oqıǵa ornyna TJD 88 qyzmetkeri jáne bólimsheleriniń 23 tehnıkasy jumyldyryldy.Turǵyndardy jylytý úshin TJD 3 vahtalyq kóligi tartyldy.
Saǵat 22.55-de órt oqshaýlandy. Oblys ákimdigi evakýaııalanǵan adamdardy qonaq úılerge jetkizýmen aınalysyp jatyr.
