Denıs Tenniń ólimine qatysty sot otyrysy jalǵasýda. Búgin Denıstiń anasy Oksana Ten kúdikti Nuraly Qııasovtyń Denıstiń óliminen keıin, ne sebepti Nuralynyń otbasynyń jaǵdaıynyń jaqsaryp ketkenin surady. Oksana Ten osyǵan deıin de, bul oqıǵanyń aıaq astynan bolmaǵanyn, tapsyryspen bolǵanyn aıtqan ıbolatyn.
"Seniń januıańnyń materıaldyq jaǵdaıy nashar bolǵan. Anań seni sot zalynan alyp shyǵý úshin nesıe alǵanyn da jaqsy bilemiz.
Al qazir, jaǵdaı múlde basqasha. Qaıǵyly oqıǵadan keıin seniń otbasyńnyń jaǵdaıy burynǵydan áldeqaıda jaqsaryp ketken. Bul - seniń kórshilerińniń aıtqany.
Oǵan qosa, úılerińniń aldynda endi sý jańa kólik tur. Muny qalaı túsindiresiń?" , - dep surady Denıs Tenniń anasy kúdiktiden.
Kúdikti Nuraly Qııasov bolsa, óz kinásin tolyǵymen moıyndap, marqum sportshynyń ata-anasy men barsha qazaqstandyqtardan keshirim surady.
"Qatty ókinemin. Keshire alsańyz, keshirińizshi meni. Túsinemin ol kisi ana, júregi aýyrady. Denıstiń ata-anasynan, barsha qazaqstandyqtardan keshirim suraımyn. Men bulaı bolaryn bilmedim. Biz urlyqqa ǵana bardyq. Adam óltiremiz dep oılaǵan joqpyz, shyn. Sol sebepti, qasaqana adam óltirý babymen kelispeımin. Úlken qatelik boldy. Qalaı bolǵanyn da túsinbeı qaldym. Oqıǵanyń bulaı aıaqtalatynyn qalamaǵan edim. Negizi ómiri qanǵa jolamaǵanmyn. Oksana hanymnan taǵy keshirim suraımyn. Ol kisige qalaı aýyr tıgenin túsinemin, bilemin. Qandaı jaza taǵaıyndalsa da, men oǵan kónemin" , - deıdi Qııasov.
"Adyrna" ulttyq portaly
