دەنيس تەننىڭ ولىمىنە قاتىستى سوت وتىرىسى جالعاسۋدا. بۇگىن دەنيستىڭ اناسى وكسانا تەن كۇدىكتى نۇرالى قياسوۆتىڭ دەنيستىڭ ولىمىنەن كەيىن، نە سەبەپتى نۇرالىنىڭ وتباسىنىڭ جاعدايىنىڭ جاقسارىپ كەتكەنىن سۇرادى. وكسانا تەن وسىعان دەيىن دە، بۇل وقيعانىڭ اياق استىنان بولماعانىن، تاپسىرىسپەن بولعانىن ايتقان يبولاتىن.
"سەنىڭ جانۇياڭنىڭ ماتەريالدىق جاعدايى ناشار بولعان. اناڭ سەنى سوت زالىنان الىپ شىعۋ ءۇشىن نەسيە العانىن دا جاقسى بىلەمىز.
ال قازىر، جاعداي مۇلدە باسقاشا. قايعىلى وقيعادان كەيىن سەنىڭ وتباسىڭنىڭ جاعدايى بۇرىنعىدان الدەقايدا جاقسارىپ كەتكەن. بۇل - سەنىڭ كورشىلەرىڭنىڭ ايتقانى.
وعان قوسا، ۇيلەرىڭنىڭ الدىندا ەندى سۋ جاڭا كولىك تۇر. مۇنى قالاي تۇسىندىرەسىڭ؟" ، - دەپ سۇرادى دەنيس تەننىڭ اناسى كۇدىكتىدەن.
كۇدىكتى نۇرالى قياسوۆ بولسا، ءوز كىناسىن تولىعىمەن مويىنداپ، مارقۇم سپورتشىنىڭ اتا-اناسى مەن بارشا قازاقستاندىقتاردان كەشىرىم سۇرادى.
"قاتتى وكىنەمىن. كەشىرە الساڭىز، كەشىرىڭىزشى مەنى. تۇسىنەمىن ول كىسى انا، جۇرەگى اۋىرادى. دەنيستىڭ اتا-اناسىنان، بارشا قازاقستاندىقتاردان كەشىرىم سۇرايمىن. مەن بۇلاي بولارىن بىلمەدىم. ءبىز ۇرلىققا عانا باردىق. ادام ولتىرەمىز دەپ ويلاعان جوقپىز، شىن. سول سەبەپتى، قاساقانا ادام ءولتىرۋ بابىمەن كەلىسپەيمىن. ۇلكەن قاتەلىك بولدى. قالاي بولعانىن دا تۇسىنبەي قالدىم. وقيعانىڭ بۇلاي اياقتالاتىنىن قالاماعان ەدىم. نەگىزى ءومىرى قانعا جولاماعانمىن. وكسانا حانىمنان تاعى كەشىرىم سۇرايمىن. ول كىسىگە قالاي اۋىر تيگەنىن تۇسىنەمىن، بىلەمىن. قانداي جازا تاعايىندالسا دا، مەن وعان كونەمىن" ، - دەيدى قياسوۆ.
"ادىرنا" ۇلتتىق پورتالى
