(ómirdiń ózi satıra)
I
Ótken jylǵy kúzde Pavlodardaǵy HQO-nyń (ON) qyzmetkeri áıel adam kelýshilerdiń birinen bir qorap «Rafaello» degen kámpıt alý ústinde ustaldy. Bir qorap kámpıt! Ne degen sumdyq! Bastalmaǵan tutas bir qorap kámpıt alǵan!
Biraq «qylmyskerdiń» bul áreketi iske aspady. Sybaılas jemqorlyqqa qarsy is-qımyl qyzmetiniń qyraǵy kózi buny qalt jibermeı, «paraqor» áıeldi dereý quryqtap, bir qorap kámpıt memlekettik qorǵa tapsyryldy. Sóıtip, memlekettik dúnıe-múlik qory bir qorap kámpıtke tolyqty. Qalaı qýanbassyz! Bul oqıǵany sol kezde áleýmettik jeliler de, oblystyq jańalyqtar qyzmeti de jarysa jazyp, jarııa qyldy. Sóıtip, Pavlodar oblysyndaǵy sybaılas jemqorlyqqa birjola tosqaýyl qoıyldy!
Jasasyn quqyq qorǵaý júıesi! Jasasyn korrýpııaǵa qarsy qyzmet toby! Eger bul qylmys sol arada ashylyp, halyqqa jarııa bolmasa, memleketimiz bundaı orasan ekonomıkalyq soqqyny kótere almas edi... Quryp ketý múmkin edi.
Esime HIH ǵasyrdyń ekinshi jartysynda jasap ótken orystyń ataqty advokaty F.Plevako tústi. Osy Plevakonyń zamanynda bir qaıyrshy kempir quny 5 tıyn turatyn mys sháınek urlap, sotty bolady. Aqshasy joq jetim kempirdi eshkim tegin qorǵaǵysy kelmeıdi. Sonda kempirdiń tegin qorǵaýshysy bolǵan Plevako sot proesi ústinde bylaı degen eken:
–Bul sorly Reseı neni bastan keshpedi?! Ol asharshylyqty da, qyrǵyn soǵysty da, kúızelisti de bastan ótkerdi. Biraq Reseı osynyń barlyǵyna tózip keldi, quryp ketpedi. Endi kelip, myna bir kempir 5 tıynnyń mys sháınegin urlapty. Bitti! Reseı bundaı soqqyǵa tóze almaıdy, Reseı qurıdy endi!
Árıne, Plevakonyń bundaı sózinen soń, kempirdi aqtap jiberedi.
Baǵasy 500 teńge turatyn bir qorap kámpıt alyp ustalǵan ON qyzmetkeri jaıly oqyǵanda, osy áńgime esime tústi.
II
2016 jyldyń 5 qyrkúıegi kúni korrýpııaǵa qarsy ulttyq bıýro «Horgos» halyqaralyq shekaralyq yntymaqtastyq ortalyǵynyń (keden) prezıdenti Vasılıı Nıdiń mıllıon dollar kóleminde para alyp jatqanda ustalǵany jaıly habarlady. Biraq keıin Almaty qalalyq soty Nıdiń bul áreketinde qylmystyń bolmaýyna baılanysty, ony birjola aqtap jiberdi...
Shynyn aıtsaq, osyǵan keremet rıza boldyq. Kim almaı jatyr qazir parany? Mıllıon dollar degen ne táıiri? Múmkin bul shamaly soma Nıdiń bir usaq-túıek sharýasyna qajet bolǵan shyǵar. Biraq sony túsine bilgen bizdiń sot júıesin aıtsańshy! Netken ádil, netken keńqoltyq adamsúıgish júıe! Nı myrzany basynan bir sıpady da, qoıa berdi.
Shynyn aıtý kerek, árkimniń jaǵdaıyn túsine biletin osyndaı zaıyrly memlekette ómir súrip jatqanyń úshin keıde taǵdyryńa sheksiz rıza bolasyń!
Biraq ana bir paraǵa kámpıt alatyn áıel sekildi adamdardan saq bolýymyz kerek, aǵaıyn! Olar qoǵamǵa qaýipti!
Saılaý Baıbosyn
