ميلليون دوللار مەن ءبىر قوراپ كامپيت

2873
Adyrna.kz Telegram

ء(ومىردىڭ ءوزى ساتيرا)

ءى
وتكەن جىلعى كۇزدە پاۆلودارداعى حقو-نىڭ (تسون) قىزمەتكەرى ايەل ادام كەلۋشىلەردىڭ بىرىنەن ءبىر قوراپ «Rafaello» دەگەن كامپيت الۋ ۇستىندە ۇستالدى. ءبىر قوراپ كامپيت! نە دەگەن سۇمدىق! باستالماعان تۇتاس ءبىر قوراپ كامپيت العان! 
بىراق «قىلمىسكەردىڭ» بۇل ارەكەتى ىسكە اسپادى. سىبايلاس جەمقورلىققا قارسى ءىس-قيمىل قىزمەتىنىڭ قىراعى كوزى بۇنى قالت جىبەرمەي، «پاراقور» ايەلدى دەرەۋ قۇرىقتاپ، ءبىر قوراپ كامپيت مەملەكەتتىك قورعا تاپسىرىلدى. ءسويتىپ، مەملەكەتتىك دۇنيە-مۇلىك قورى ءبىر قوراپ كامپيتكە تولىقتى. قالاي قۋانباسسىز! بۇل وقيعانى سول كەزدە الەۋمەتتىك جەلىلەر دە، وبلىستىق جاڭالىقتار قىزمەتى دە جارىسا جازىپ، جاريا قىلدى. ءسويتىپ، پاۆلودار وبلىسىنداعى سىبايلاس جەمقورلىققا ءبىرجولا توسقاۋىل قويىلدى!
جاساسىن قۇقىق قورعاۋ جۇيەسى! جاساسىن كوررۋپتسياعا قارسى قىزمەت توبى! ەگەر بۇل قىلمىس سول ارادا اشىلىپ، حالىققا جاريا بولماسا، مەملەكەتىمىز بۇنداي وراسان ەكونوميكالىق سوققىنى كوتەرە الماس ەدى... قۇرىپ كەتۋ مۇمكىن ەدى.
ەسىمە ءحىح عاسىردىڭ ەكىنشى جارتىسىندا جاساپ وتكەن ورىستىڭ اتاقتى ادۆوكاتى ف.پلەۆاكو ءتۇستى. وسى پلەۆاكونىڭ زامانىندا ءبىر قايىرشى كەمپىر قۇنى 5 تيىن تۇراتىن مىس شاينەك ۇرلاپ، سوتتى بولادى. اقشاسى جوق جەتىم كەمپىردى ەشكىم تەگىن قورعاعىسى كەلمەيدى. سوندا كەمپىردىڭ تەگىن قورعاۋشىسى بولعان پلەۆاكو سوت پروتسەسى ۇستىندە بىلاي دەگەن ەكەن:
–بۇل سورلى رەسەي نەنى باستان كەشپەدى؟! ول اشارشىلىقتى دا، قىرعىن سوعىستى دا، كۇيزەلىستى دە باستان وتكەردى. بىراق رەسەي وسىنىڭ بارلىعىنا ءتوزىپ كەلدى، قۇرىپ كەتپەدى. ەندى كەلىپ، مىنا ءبىر كەمپىر 5 تيىننىڭ مىس شاينەگىن ۇرلاپتى. ءبىتتى! رەسەي بۇنداي سوققىعا توزە المايدى، رەسەي قۇريدى ەندى!
ارينە، پلەۆاكونىڭ بۇنداي سوزىنەن سوڭ، كەمپىردى اقتاپ جىبەرەدى.
باعاسى 500 تەڭگە تۇراتىن ءبىر قوراپ كامپيت الىپ ۇستالعان تسون قىزمەتكەرى جايلى وقىعاندا، وسى اڭگىمە ەسىمە ءتۇستى.

ءىى
2016 جىلدىڭ 5 قىركۇيەگى كۇنى كوررۋپتسياعا قارسى ۇلتتىق بيۋرو «حورگوس» حالىقارالىق شەكارالىق ىنتىماقتاستىق ورتالىعىنىڭ (كەدەن) پرەزيدەنتى ۆاسيلي ءنيدىڭ ميلليون دوللار كولەمىندە پارا الىپ جاتقاندا ۇستالعانى جايلى حابارلادى. بىراق كەيىن الماتى قالالىق سوتى ءنيدىڭ بۇل ارەكەتىندە قىلمىستىڭ بولماۋىنا بايلانىستى، ونى ءبىرجولا اقتاپ جىبەردى...
شىنىن ايتساق، وسىعان كەرەمەت ريزا بولدىق. كىم الماي جاتىر قازىر پارانى؟ ميلليون دوللار دەگەن نە ءتايىرى؟ مۇمكىن بۇل شامالى سوما ءنيدىڭ ءبىر ۇساق-تۇيەك شارۋاسىنا قاجەت بولعان شىعار. بىراق سونى تۇسىنە بىلگەن ءبىزدىڭ سوت جۇيەسىن ايتساڭشى! نەتكەن ءادىل، نەتكەن كەڭقولتىق ادامسۇيگىش جۇيە! ني مىرزانى باسىنان ءبىر سيپادى دا، قويا بەردى.
شىنىن ايتۋ كەرەك، اركىمنىڭ جاعدايىن تۇسىنە بىلەتىن وسىنداي زايىرلى مەملەكەتتە ءومىر ءسۇرىپ جاتقانىڭ ءۇشىن كەيدە تاعدىرىڭا شەكسىز ريزا بولاسىڭ!
بىراق انا ءبىر پاراعا كامپيت الاتىن ايەل سەكىلدى ادامداردان ساق بولۋىمىز كەرەك، اعايىن! ولار قوعامعا قاۋىپتى!

سايلاۋ بايبوسىن

پىكىرلەر