Qostanaida qala tūrǧyny men polisiia köpırden sekırgısı kelgen äieldı qūtqardy. Būl turaly Polisia.kz mälımdedı, dep habarlaidy “Adyrna” tılşısı.
10 jeltoqsan künı saǧat 14:10-da 102 pultıne köpırde sekıreiın dep tūrǧan äiel turaly habarlama tüstı. Būl aqparatty sol maŋnan ötıp bara jatqan kölık jürgızuşısı jetkızdı.
"Tezırek kelıŋızder, men ony qūtqaruǧa tyrysamyn", – dedı er adam.
Oqiǧa ornyna polisiia aǧa leitenanty Jalǧas Şonov pen polisiia kapitany Dulat Armanov tez arada jettı.
"Bız kelgen kezde er adam äieldıŋ qolynan ūstap tūrdy. Ony köpır üstıne şyǧaruǧa tyrysyp jatty", – dedı Jalǧas Şonov.
Poliseiler äieldı şyǧaryp, ony polisiia kölıgıne otyrǧyzuǧa kömektestı.
"Qūtqarylǧan adamnyŋ jaǧdaiy auyr boldy, tıptı aty men tegın atai almady. Bızge ony şūǧyl türde polisiia bölımşesıne jetkızuge tura keldı", – dep jalǧastyrdy Dulat Armanov.
Oqiǧa ornyna bırınşı bolyp barǧan jürgızuşı poliseilerdıŋ äielge alǧaşqy medisinalyq kömek körsetkenıne köz jetkızıp, abyr-sabyr kezde ketıp qalǧan.
"Syn saǧattaǧy batyl äreketı men kömegıne alǧys bıldıru üşın erjürek qostanailyqtan habarlasuyn sūraimyz", – dedı polisiia.
