24.kg habarlaýynsha, Qyrǵyzstan men Tájikstannyń shekara qyzmetiniń ókilderi Batken aýdanynyń Dahma aımaǵynda kezdesken.
Qos tarap kelissóz barysynda Qyrǵyzstan men Tájikstan turǵyndary arasyndaǵy janjaldyń egjeı-tegjeıin zerttedi.
"Tóbeles faktisin IIM aýmaqtyq organdary zerttep jatyr. Buǵan qosa, atalǵan ýchaskege IIM-niń qosymsha jasaqtary jiberiledi. Taraptar aldaǵy ýaqytta shekaranyń birlesip kúzetiletin ýchaskesindegi jaǵdaıdyń ýshyǵýyna jol bermeýge ýaǵdalasty", - dep habarlady Qyrǵyz Respýblıkasynyń shekara qyzmeti.
Oraıy kelgende aıta keteıik, Oqys oqıǵa 3 jeltoqsan kúni túske taman boldy. Eki eldiń azamattary ózara sózge kelip qalǵan. Ádemsiz sózderden keıin eki eldiń ókilderi bir-birine tas atqan. Saldarynan tájikstandyq azamattyń basy jarylyp, qulaǵy jaraqattanyp, aýrýhanaǵa jetkizildi.
"Adyrna" ulttyq portaly