Qyrǵyzstanda avtokólikke salynatyn salyq tolyǵymen joıyldy. Bul týraly búgin Sadyr Japarov óziniń Facebook paraqshasynda jarııalady, dep habarlaıdy "Adyrna" ulttyq portaly.
Jarlyqqa sáıkes, prezıdent avtokólikterge salynatyn salyqty tolyǵymen alyp tastaýdy tapsyrǵan.
"Bul sheshim "Jol qory týraly" zańǵa engizilgen ózgeristerge baılanysty qabyldandy. Zań boıynsha ár lıtr janarmaıdan bir som mólsherinde alym alynady. Kólikterge salynatyn salyq alynyp tastaldy, onyń ornyna 2025 jyldyń 1 qańtarynan bastap ár lıtr benzın nemese dızel otyny úshin bir som (6,11 teńge) alynady" - dedi Sadyr Japarov.
Sondaı-aq, prezıdent 2025 jyldyń 1 qańtaryna deıin avtokólik salyǵyn tólemegen azamattardy salyqtan bosatýdy tapsyrdy.
"Salyq tólemegen azamattardyń sany az emes ekeni anyqtaldy. Memleket úshin úlken qıyndyqtarǵa qaramastan, biz osyndaı sheshim qabyldadyq" - dedi Qyrǵyzstan prezıdenti.
Japarov sóziniń sońynda memlekettiń kúshi men damýy jınalatyn salyqtarǵa baılanysty ekenin eske saldy.
"Jalaqyny, zeınetaqyny, járdemaqyny arttyrý, áleýmettik nysandar salý, joldardy asfalttaý jáne basqa da jumystar jınalǵan salyqtarǵa táýeldi. Biz salyq tólemeý jazasyz qalatyn nárse degen túsinikten arylýymyz kerek. Biz úlgi tutatyn damyǵan elderde salyq tóleý mindet sanalady. Olardy tólemeý nemese salyqtan jaltarý úshin óte qatal jaza qarastyrylǵan. Sondyqtan bizde de salyqtar mindetti bolýy tıis. Osy sátten bastap salyqty ýaqytyly tóleńizder"- dep jazdy ol.
