“Halyqqa portfelin kómekshisine arqalatyp, esigin bireýge ashqyzyp, taltańdap júretin depýtattar qajet emes. Prezıdentimizdiń aıtqan Ádiletti Qazaqstany bolý úshin, “Amanat” partııasyna halyq sensin dese, túbegeıli ózgerý kerek”. Bul pikirdi QR Jýrnalıster odaǵynyń múshesi, “Qara shańyraq” ulttyq tárbıe ortalyǵynyń jetekshisi, etnolog-tarıhshy Turar Sáttarqyzy óziniń feısbýk paraqshasynda jazdy, dep habarlaıdy “Adyrna” ulttyq portaly.
“Prezıdenttiń saılaýynan keıin Jańa Qazaqstan, Ádiletti Qazaqstan dep jatyrmyz. Jańa Qazaqstanǵa jańa tulǵalar kerek deımiz. Ózgere alady ma, álde “baıaǵy jartas, sol jartas” bolyp qala bere me? Astana qalasynan Senatqa saılanǵan Aqylbek Kúrishbaevtyń senattaǵy orny bosap, ol orynǵa 3 kisi túsipti. Bolashaq senatordy qala depýtattary daýys berip, qoldaýy kerek. Aıtpaqshy, túsip jatqan bir úmitker 60-tan asqan adam. Ózi qalalyq depýtat eken. Biraq sol kisiniń halyq arasynda júrip, bir sharýa jasap júrgenin kórmeppin. Máslıhat otyrystarynan da kórmeımiz. Áleýmettik jelide únsiz. Halyqqa jaqyn emes adam ótpeıdi dep sengim keledi. 60 -tal tús deıtin dana halqymyz. Senat, parlament zeınetke shyqqandardyń demalyp otyratyn “jumsaq kreslosy” bolmasa eken. Tipti bireýi senator, bireýi májilis, bireýi máslıhat depýtattary bolǵan aǵaıyndylar bolǵan. Osyndaı “shyrmaýyqtaı shyrmalǵan” týystyq, rýlyq, aǵaıyndyq toqtamaı, biz kógermeımiz.Óıte bersek, Ádiletti Qazaqstannyń aýyly alys.”,- dep jazdy Turar Sháken.
Onyń aıtýynsha, Jańa Qazaqstanǵa memlekettik tildi erkin meńgergen, halyqqa jaqyn depýtattar qajet.
“Jańa Qazaqstanǵa energııasy túgesilgen, halyqqa bereri joq depýtat emes, kúsh-qaıraty bar, halyqqa jaqyn, halyqqa sózin ótkize alatyn depýtattar kerek. Partııaǵa jańashyl, ıdeıashyl, bastamashyl tulǵalardy tartý kerek. Burynǵy eski súrleýdi tarıhqa jiberip, ádiletti saılaý jasaý kerek! Mindetti túrde memlekettik tilde sóıleıtin, harızmasy myqty bolsa, quba-qup. Áıtpese, júrekten shyqpaǵan, bireý jazyp bergen sózderin myńq-myńq etip, qaǵazǵa qarap oqıtyndar endi halyqqa ótpeıdi. Olarǵa halyq endi senbeıdi. Halyqqa portfelin kómekshisine arqalatyp, esigin bireýge ashqyzyp, taltańdap júretin depýtattar qajet emes. Olardyń zamany ótti”,- deıdi tarıhshy.
Turar Sáttarqyzynyń aıtýynsha, bılik halyqtyń seniminen shyǵamyn dese, aldaǵy saılaýlar ádil ótýi tıis.
“Prezıdentimizdiń aıtqan Ádiletti Qazaqstany bolý úshin, “Amanat” partııasyna halyq sensin dese, túbegeıli ózgerý kerek. Eger daýys berý taza, ádil ótse ǵana, halyq seniminen shyǵa alasyzdar. El Prezıdentiniń halyqqa bergen ýádesin oryndaı alasyzdar. Prezıdentke degen adaldyqtaryńyzdy kórsete alasyzdar. Eki jol joq, jol bireý-aq! Ol joldyń aty - Halyq senimi! Burynǵy sengish, kónbis halyq joq, halyq oıandy. Joǵalǵan halyq senimin qaıtarý, halyqtyń úddesinen shyǵý úshin aldaǵy saılaýlar, taǵaıyndaýlar taza bolsyn. Bul halyqtyń oıy. Al bılik halyqpen sanasýǵa mindetti”,- dep aıaqtady sózin “Qara shańyraq” ulttyq tárbıe berý ortalyǵynyń jetekshisi.
