Qostanaı qalasyna jańa jyl merekesine qyzý oraı bıyl jergilikti bıýdjetten shyrsha ornatyp, muz qalashyq salýǵa 40 mln teńge bólingen, dep habarlaıdy “Adyrna” ulttyq portaly “Astana” telearnasyna siltep,
Oblys ortalyǵynda ornatylatyn jańa jyl nyshanyn bezendirýge bıýdjetten 20 mln teńgeden asa aqsha jumsalsa, muz qalashyq pen túrli músinderge 16 mln 800 myń teńge qarastyrylǵan. Alaıda qala ákimi bul qarajattyń ózi jetkiliksiz dep otyr.
“Oblys ortalyǵy úshin bul kóp aqsha emes. Sondyqtan bul jumysqa barlyqtaryńyzdyń atsalysýlaryńyzdy suraımyn. Kóshege shyǵyp, birdeńe isteýdiń keregi joq. Áýeli óz ǵımarattaryńyzdy bezendirip, óz tutynýshylaryńyz úshin merekelik jaǵdaı jasańyzdar”, – dedi Qostanaı qalasynyń ákimi Marat Júndibaev.
Sondaı-aq, qaladaǵy taǵy eki shaǵyn aýdanda merekelik shyrsha boı kóteredi. Jańa jyl qarsańynda qalalyq jaǵajaı aýmaǵy da demalys ornyna aınalyp, onda syrǵanaq ornatylady, shańǵy joly salynady. Tamaqtaný orny da ashylyp, adamdar jylynatyn arnaıy vagondar da qoıylady eken.
