AQSh-taǵy Djordjııa shtatynyń Atlanta qalasynda turatyn stýdent, álemniń 25 tilinde erkin sóıleıtin polıglot qyz qazaq jigitine jar bolýdy armandaıdy. Bul jaıly amerıkalyq qyz "el.kz" portalyna bergen suhbatyndaǵy áńgime arasynda oraıyn keltirip, aıtyp qaldy. Onyń qazaq tiline degen qurmeti "júregimniń ıesi de qazaq jigiti bolsa eken" degen armanyna jol ashqan. Qyzdyń esimi – Kemeron. Qazaqsha aty – Aıbala. Qazaq tilinde emin-erkin sóıleıdi.
"El.kz"-tiń habarlaýynsha, onyń Qazaq eline degen aıryqsha qyzyǵýshylyǵy Qyzylorda qalasynan bala asyrap alý sapary týraly jazǵan bireýdiń kitabyn oqyǵannan keıin oıanǵan. Qazaq tiline jáne salt-dástúrine degen yqylasy artqan.
«Osy kitapty oqyǵannan keıin aldymda bir maqsat turdy. Qazaq tilin 2020 jyldyń qańtarynda úırendim. Búginde erkin sóıleı alamyn. Onlaın arqyly da úırenýge bolady. Meniń oıymsha, qazaq tilinde sóıleıtinder túrki halyqtarynyń tilin ońaı úırene alady», – deıdi.
Sondaı-aq, ol ózi meńgergen 25 tildiń ishinde bir-birine uqsas keletin tildi atap ótti. Iaǵnı, úırenýge kelgende qıyndyq soqpaǵanyn aıtty.
«Uqsas tildiń ishinde qazaq, ıakýt, qyrǵyz, ózbek, uıǵyr sııaqty túrki tilderi bar. Bireýin bilseńiz, ekinshisin úırený óte ońaı. Al úırenýge qıyndyq týdyrǵan tildiń keıbiri aıtylýy, alfavıt jáne grammatıka jaǵynan boldy», – dedi ol.
Amerıkalyq stýdent ózi sııaqty qatarlastaryna til úırený kezinde ana tilinde sóıleıtindermen jıi tájirıbe almasý asa mańyzdy ekenin aıtady.
«Sol arqyly ózge tildi úırenýdiń árdaıym paıdasy bar. Qazaqstanda turatyn qazaqtar mindetti túrde óz tilin bilý qajet. Óıtkeni, qazaq tiliniń baılyǵy óte kóp. Men ony til úırený barysynda túsindim», – deıdi Aıbala.
Ol qazaq tilin bilse de, Qazaqstanǵa áli kelip kórmegen eken. Alaıda bolashaqta Qyzylorda nemese Saryǵashta turǵysy keledi.
«Qazaq tilin bilsem de, qazaq jerine baryp kórmedim. Aldaǵy ýaqytta mindetti túrde josparlap otyrmyn. Sebebi qazaq dostarym óte kóp jáne qazaq elin qatty qurmetteımin. Mádenıetine, salt-dástúrine qyzyǵamyn. Tabıǵaty da sulý. Dámdi-taǵamy men qonaqjaılyǵy bir de tóbe», – deıdi polıglot stýdent.
Aıbala búgingi tańda ıslam dinin qabyldaǵan jáne qazaq jigitine turmysqa shyǵýǵa nıetti. Ony qazaq jigitteriniń ór tulǵasy men alyp qashý sııaqty salt-dástúr erekshe qyzyqtyrady eken. Bolashaqta qazaqtyń dástúrimen toı jasaýdy qalaıdy.
Amerıkalyq stýdent áleýmettik jelide óte belsendi. Qazaqsha vıdeosyn kórgen jeli qoldanýshylary oǵan rızashylyǵyn bildirip, aq tilegin jaýdyrtýda. «Qazaqshańyz óte jaqsy eken», «Elimizde turatyn ózge ulttardan jáne qazaqtardan jaqsy sóıleısiz», «Kelseń, kútip alamyz», – dep jazýda jeli qoldanýshylary.
"Adyrna" ulttyq portaly
