Bir jyl buryn elde Alashty ǵana emes, álemdi dúrliktirgen "Qańtar oqıǵasy" boldy. Qazaq halqynyń qazynasyn eki asap, bir jeýge dánikkenderge qarsy halyq jappaı kóterildi. Eldegi gaz baǵasynyń qymbattanýy, áleýmettik qaıshylyqtar, ómir sapasynyń nasharlaýy, klanaralyq tartystar syndy belgiler halyqtyń soqtasyn sýytyp, jalpy jurtty ashyndyrdy. "Adyrna" ulttyq portaly bolǵan oqıǵaǵa qatysty saraptamashy jýrnalıst, belgisi qoǵam belsendisi Asylhan Mamanulynyń taldaýyn usynady.
Jýrnalıst Asylhan Mamashuly "Qańtar oqıǵasynyń" tarıhı mańyzy men saıası salmaǵyna úńile kele tóendegideı qorytyndyǵa kelgen.
- Joldastar, qańtar kóterilisi nátıjesiz aıaqtaldy demeńizder, osy kóterilis áli de ondaǵan jylǵa jalǵasýy múmkin Nazarbaev júıesine dáý núkte qoıdy. Nurpartııasy men basqa nókerleri qala ma, joq pa báribir, endi saıası rıtorıka basqa bolady. Biz Nazarbaev dáýirinen keıingi kezeńge kóshtik. Eki prezıdenttiń el bıligin oıynshyqqa aınaldyrǵany, bılik tranzıtin jasaǵansyp, spektakl qoıǵany – júzdegen shańyraqtyń tragedııasymen aıaqtaldy. Tragedııa suraýsyz ketpeıdi.Qazaqstanda qos bılik baryn, de fakto Nazarbaev yqpaly basym bolǵanyn bular qańtar kóterilisinen keıin ǵana moıyndady. Qańtar kóterilisi Nazarbaevtyń otyz jyl boıy qýlyq-sumdyqpen jınaǵan sýper prezıdenttik bıligin Toqaevqa bir kúnde áperdi. Sol úshin ol raqmet aıtýy kerek edi. Toqaev nurpartııa sıezinde Nazarbaev eńbegine joǵary baǵa berdi, jetistikterin kóbirek aıtaıyq dedi. Osy sózimen Nazarbaevty tarıhqa jiberdi jáne baǵa berý kezeńine jol ashty.
Asylhan Mamashulynyń birqatar boljamdarynyń shyndyqqa ulasqanyna kóz jetkizý qıyn emes. Avtor "Astana" ataýynyń qaıta oralatynyn da aıtqan edi. 2022 jyly 17 qyrkúıekte prezıdent Qasym-Jomart Toqaev jarlyǵymen Astana ataýy qaıtaryldy. Eldegi saıası oqıǵanyń aldaǵy ýaqytta qandaı baǵytta órbeıtindigine qatysty:
- Munan bylaı saıası qyzmetkerler de Nazarbaevtyń eńbegi men qateligin qatar aıtatyn bolady. Biraq ol uzaqqa sozylmaıdy. Qaısysy basym ekeni málim. Nur–Sultan qalasy, júzdegen Nazarbaev eskertkishi men kósheleri turǵanda Toqaev aıta bastaǵan "túbegeıli saıası ózgeris" bolmaıdy. Demek, Astana ataýy qaıtar kún alys emes. Ony Toqaev ózgerte me, Boqaev ózgerte me, kóp qalǵan joq.Keshegi jıynda Toqaevtyń "Ótkendi joqqa shyǵaratyn, el basshylaryna shabýyl jasaıtyn halyqtyń bolashaǵy bulyńǵyr" degen sózin kóńilge almańyzdar. "Birer jyldan soń men de ketem, tıispeńdershi" degeni. Biraq qazaq halqynyń eshkimge garantııa bermeıtini, reti kelgende áreketine qaraı baǵalaıtyny túsinikti boldy emes pe? - dep jazdy jýrnalıst.
"Adyrna" ulttyq portaly
