Respýblıkalyq «Úzdik pedagog» baıqaýynda Aqtaý qalasyndaǵy Nazarbaev Zııatkerlik mektebiniń qazaq tili jáne ádebıet pániniń muǵalimi Jannur Maýytova úzdikter qatarynan kórindi.
Aǵymdaǵy jyldyń qyrkúıek-qarasha aıynda ótken baıqaý 3 kezeńnen turdy. Osy úsh kezeńnen súrinbeı ótip «Úzdik pedagog» ataǵyna ıe bolǵan Jannur Maýytovany búgin QR Oqý-aǵartý mınıstri Ashat Aımaǵambetov marapattady.
Mınıstr áriptesterin «Úzdik pedagog» ataǵymen quttyqtap, óz isine adaldyǵy men bilim salasyn damytýǵa qosqan úlesteri úshin alǵysyn bildirdi. Sondaı-aq mınıstr ustazdarǵa qıyn bolsa da, biraq uly kásipte jańa tabys men jetistik tiledi.
Ustazdyq mamandyq árqashan eń qurmetti mamandyqtardyń biri. Al búginde, sizder Ahmet Baıtursynov, Ybyraı Altynsarın syndy ulaǵatty aǵartýshylardyń ıgilikti isin jalǵastyrýshy jansyzdar, - dedi Ashat Aımaǵambetov.
Jannur Maýytova Zııatkerlik mekteptiń bilikti ustazy, kóptegen úzdik ǵylymı jobalardyń jetekshisi. Ustazdyń birneshe jobasy avtorlyq quqyqqa ıe boldy. Jannur Maýytova jetekshilik etýimen jyl saıyn Aqtaý qalasyndaǵy Nazarbaev Zııatkerlik mektebiniń oqýshylary jalpy bilim beretin pánder boıynsha ótetin ǵylymı jobalar konkýrsynyń, pándik olımpıadalardyń túrli kezeńderinde úzdik nátıjelerge qol jetkizip keledi.
Birneshe kezeńderden ótken saıysta jol júrýler sharshatqanymen, dodada jaryp jeńip shyǵý maqsat boldy, mektebim men otbasymnyń úkilegen úmitin aqtaý, kásibı biliktiligimdi tanytý basty nysanǵa aınaldy. Jeńisimdi alǵashqy estigen sátte kóz jasyna erik berdim, sebebi, uıqysyz túnder, tolassyz pándik olımpıadaǵa shákirtterimdi daıyndaýlar men ǵylymı jobalarǵa oqýshylardy ázirleý, oqý baǵdarlamalary men oqý josparlaryn qurastyrý sııaqty san qyrly ustazdyq eńbegimniń aqtalǵanyna, moıyndalǵanyna rızalyq basym boldy. Meniń jeńisim - kásibı damýyma yqpal etken Nazarbaev Zııatkerlik mektepter júıesiniń, mektebim men áriptesterimniń, kásibı ósýim men keıbir kásibı qatelikterimniń kýási bolǵan oqýshylarymnyń jeńisi dep bilem,- deıdi «Úzdik pedagog» Jannur Qalybaıqyzy
Sondaı aq óskeleń urpaqtyń bilim berý jáne tárbıe isine qosqan eleýli úlesi úshin 2020 jyly Maýytova Jannur Qalybaıqyzy Qazaqstan Respýblıkas Bilim jáne Ǵylym mınıstriniń Qurmet gramotasymen marapattalǵan.
Respýblıkalyq konkýrs komıssııasynyń quramynda qoǵamdyq birlestikterdiń, úkimettik emes uıymdardyń, ata-analar qaýymynyń ókilderi, jýrnalıster, belsendi pedagogter, bilim jáne ǵylym qyzmetkerleriniń qazaqstandyq salalyq kásipodaq uıymynyń ókilderi boldy.
2022 jylǵy «Úzdik pedagog» baıqaýyna 5000 myńnan astam pedagog iriktelip, konkýrs qorytyndysy boıynsha 64 jeńimpaz anyqtalyp, marapattaldy.
«Úzdik pedagog» respýblıkalyq konkýrsy 2012 jyldan beri ótkizilip keledi. Osy ýaqyt aralyǵynda 600-ge jýyq ustaz úzdik atandy.
