Toqsanǵa kelgen pavlodarlyq keıýana halyqty aýyzbirlikke shaqyrdy. Tanaı áje búginde nemere, shóberelerin qosqanda 154jannan quralǵan úlken áýlettiń súıenishi, ózegi bolyp otyr. 14 perzent súıip, ulyn uıaǵa, qyzyn qııaǵa qondyrǵan keıýana Pavlodar oblysyna qarasty Aqqýly aýdanynda turady. Aıta keter jaı, 2019 jyly dúnıege kelgen shóberesiniń esimin yrymdap, el Prezıdentiniń qurmetine Qasym-Jomart qoıǵan eken.
Búgin Pavlodar oblysyna jumys saparymen kelgen el Prezıdenttigine úmitker Qasym-Jomart Toqaevty qoldaý jónindegi respýblıkalyq shtab músheleri Tanaı Naımanbaıqyzynyń shańyraǵynda bolyp, ájeniń batasyn aldy.
Ǵasyrǵa jýyq jasaǵan áje — talaı tarıhı kezeńderdiń kýási.
«Eldiń tynyshtyǵyna jeter qazyna joq. Búgingi jas urpaq sony túsinýi kerek. Men ata jurtyn ańsap kelgen kóp qazaqtyń birimin. Allaǵa shúkir, urpaǵym táýelsiz Qazaq elinde ósip, órkendep keledi. Endigi armanym, osy beıbit ómirdiń baıandylyǵy, urpaqtyń amandyǵy», — deıdi Tanaı áje.
Toqsanǵa kelse de toptan qalmaı, sabaqty ınesin qolynan tastamaıtyn keıýana áli de gazet oqyp, eldegi jańalyqqa qulaǵy túrik júredi. Áje el úshin mańyzdy kezeńderde halyqty judyryqtaı jumylyp, aýyzbirlikte bolýǵa shaqyrady.
«Betege ketip, bel qalar. Bekter ketip, el qalar. Berekeń ketse neń qalar!?». Biz memleketimiz úshin mańyzdy shaqtarda judyryqtaı jumylyp, aýyzbirlikte bolýymyz kerek. Qazaqqa qazaqtan basqa eshkimniń jany ashymaıdy. Berekege bekem bolyńdar», — dep batasyn berdi Tanaı Naımanbaıqyzy.
