Búgin dramatýrg Roza Muqanova “Máńgilik bala beıne” pesasynyń jazylýyna arqaý bolǵan keıipkermen tuńǵysh ret sahnada kezdesti. Bul týraly Maqpal Jumabaı Facebook paraqshasyna jazdy, dep habarlaıdy “Adyrna” ulttyq portaly.
“Meniń súıikti dramatýrgim Roza Mukanova búgin “Máńgilik bala beıne” pesasynyń jazylýyna arqaý bolǵan keıipkerimen tuńǵysh ret sahnada júzbe-júz kezdesti. Tolqynysty ári tarıhı sát…
Bolat Atabaevtyń sahnalaýyndaǵy týyndyǵa mamam Bıǵaısha Medeý, qatelespesem, bastaýysh synypta oqyǵanymda apardy. Balalyq júregimde alapat tóńkeris bolǵany esimde. Sol kúnnen bastap, “Máńgilik bala beıne” - meniń shyndyq pen izgilik jolyndaǵy jaryq sáýlem boldy. Jazýǵa, ónerge áýestenýime sebepker boldy. Úıdiń keregesine ádebı jýrnaldyń muqabasyna shyqqan sulý jazýshynyń sýreti ilindi.
Kishkentaı adamnyń ómirine orasan oı jáne jol salatyn osyndaı oqıǵalar bolady. Búgin sol oqıǵa sanamda qaıta jańǵyrdy. Rejısser Abzal Ashatuly “Qanattylar” ınklıýzıvti teatrynda bolmysy múldem bólek “Máńgilik bala beıne” jasapty. Bul qoıylym da talaı kórermenniń shyndyq pen izgilik jolyndaǵy jaryq sáýlesi bolary haq”,- dep jazdy ol.
