Aqtau qalasyndaǧy himiia-biologiia baǧytyndaǧy Nazarbaev Ziiatkerlık mektebınde jas mūǧalımderdıŋ aimaqtyq forumy öttı.
Pedagogikalyq şeberlık ortalyǧy filialynyŋ ūiymdastyruymen «Jas ūstaz: tabysqa aparar jol» atty oblystyq forumy ötkızıldı. Būl şara tamyz aiynda elordada respublika kölemınde ötken forumynyŋ jalǧasy.
Maŋǧystau oblysy mektepterınen qatysqan 140-tan astam mūǧalımge pedagogikalyq şeberlık ortalyǧy mamandary sabaq qūrylymyn zertteu, funksionaldy sauattylyqty arttyru, oqytuda AKT-ny tiımdı qoldanu siiaqty maŋyzdy taqyryptar boiynşa treningter ūiymdastyrdy. Forumda taqyryptyq alaŋdar, jas ūstazdardyŋ şeberlık sabaqtary jäne Active SPOT alaŋdary jūmys jasady.
Forumnyŋ aşylu saltanatynda Maŋǧystau oblysynyŋ bılım basqarmasynyŋ basşysy Dinara Jūmaşeva jas ūstazdarǧa qoldau körsetıp, tabysty mūǧalım qandai bolu kerektıgın atap öttı. Aqtau qalasyndaǧy Nazarbaev Ziiatkerlık mektebınıŋ direktory RinatJūmabaev qazırgı jas ūstazdarǧa şeberlıgın şyŋdau üşın elımızde qarastyrylǧan mümkındıkterge toqtalyp, ūstazdarǧa berılgen bar mümkındıktı paidalanyp, bılıktı maman boluǧa şaqyrdy.
«Jas ūstaz: tabysqa aparar jol» oblystyq forumynda söz söilegen bır qatar qatysuşylar men qonaqtar forumnyŋ maŋyzdylyǧyna toqtaldy.
- Tamyz aiynda respublika kölemınde ötken forumnyŋ qatysuşysy retınde būndai şaranyŋ ūstazdar üşın, äsırese jas mamandar üşın maŋyzdy ekenın aitqym keledı. Öitkenı ūstazdar qauymy eldıŋ erteŋı, bolaşaǧy. Olarǧa ärdaiym qoldau körsetu arqyly bolaşaqqa nyq senımmen qarauǧa äbden bolady. Bügın mıne ölkemızdegı daryndy, jas ūstazdardyŋ basyn qosyp, ötken forumnan alǧan äserımızben, täjıribemızdı ortaǧa salyp, teoriialyq mälemetterdı bölısıp jatyrmyz,- deidı Marat Qaniev, Aqşūqyr mektep-liseiınıŋ qazaq tılı men ädebietı pänı mūǧalımı
Sondai aq «Jas ūstaz:tabysqa aparar jol» forumyna arnaiy şaqyrylǧan qonaqtar Bokstan Olimpiada oiyndarynyŋ ekı dürkın kümıs jüldegerı, Aziia oiyndarynyŋ chempiony Ädılbek Niiazymbetov, Qazaqstan jazuşylar odaǧynyŋ müşesı Baqtybai Jailau, N. Janturin atyndaǧy drama teatrynyŋ akteryErkebūlan Beken jas ūstazdarmen sūhbattasyp, sūraqtaryna jauap berdı.
- Jas ūstazdarǧa arnalǧan oblystyq forum öte joǧary deŋgeide öttı. Qyzyq bolǧany sonşa uaqyttyŋda qalai ötkenın baiqamadyq. Desede köŋıl köteru ärine jaqsy bıraq, osy forumnan alǧan bılımımız bıraz jylǧa azyq bolary sözsız. Ūstazdyq etken şaqtan bügınge deiın oblystyŋ tükpırınen kelgen ūstazdarmen alǧaş ret kezdesıp, täjıribe almasudamyn. Däl osyndai kezdesuler jas ūstazdarǧa şynymen de qajet. Qazır zamannyŋ qarqyndy damyǧan şaǧynda mektepterde qalys qalmai, oqytudyŋ jaŋa baǧyttaryn paidalanuda. Osy tūsta ūstazdar qauymy bır jūdyryqtai jūmylyp, bır-bırımızge jaŋa dünienı üiretıp, täjıribe almasu öte maŋyzdy,- dedı Baqytgül Tıleubaeva Jaŋaözen qalasy №24 mektep-liseiınıŋ ūstazy
- Ūstaz - ūlt bolaşaǧymen el tūǧyrynyŋ kepılı bolu kerek. Erteŋımız üşın alaŋdaityn el bolsaq kez kelgen mäselenı ūstazdardan bastaǧanymyz jön. Ūlt bolaşaǧyn tärbieleuşılerge öz deŋgeiınde qoldau bıldıru qajet, äsırese ūstazdyq degen ūly jolǧa endı qadam basqan jas mamandarǧa. Mıne bügıngı forumnyŋ basty maqsaty osy,- Pedagogikalyq şeberlık ortalyǧynyŋ direktory Qatira Boranbaeva
Forum soŋynda kerı bailanys ūiymdastyrylyp, jas ūstazdar qauymynan syndarly qajettı kerı bailanystar berıldı.
