Oblys ákimdiginde ótken jedel keńeste óńir basshysy Ǵalı Esqalıev óńirde jumyspen qamtý deńgeıiniń tómendigin, jastarmen jumystyń óz deńgeıinde júrgizilmeı jatqanyn aıtty, dep habarlaıdy “Adyrna” ulttyq portaly.
Jıyn barysynda kommýnaldyq múlikti senimgerlik basqarýǵa berý jáne jol qozǵalysy qaýipsizdigin qamtamasyz etý máseleleri de talqylandy.
BQO jastar saıasaty basqarmasynyń basshysy Dýlat Imashevtyń aıtýynsha, qazirgi tańda «Bolashaǵyń óz qolynda» jobasy aıasynda memlekettik baǵdarlamalardy naqtylaý jumystary júrgizilgen. «Dıplommen aýylǵa» baǵdarlamasy boıynsha 700-ge jýyq jas mamanǵa kóterme járdemaqy retinde 213,3 mıllıon teńge, 307 mamanǵa jalpy somasy 1 386,9 mıllıon teńgege turǵyn úı alýǵa nesıe berilipti. «Jasyl el» baǵdarlamasy boıynsha 1175 adam jumysqa ornalassa, «Stýdenttik qurylys jasaqtary» jobasy boıynsha nebári 460 kvota ıgerilgen, óz kezeginde 8 myńǵa jýyq jas maman keńes alyp, jumyspen qamtý ortalyqtaryna jiberilgen. Sondaı-aq joba aıasynda bıylǵy jyldyń sońyna deıin 500 adamdy jumyspen qamtý josparlanýda. Jazda kásipkerler men jas mamandardyń kezdesýleri uıymdastyryldy. Búgingi tańda «Modısal» jıhaz fabrıkasymen kolledj stýdentterin óndiristik tájirıbeden ótkennen keıin jumysqa ornalastyrý úshin kelisimshart jasalǵan. Oqýyn aıaqtaǵan aspazdar men daıashylardy jumysqa alý úshin meıramhana ıelerimen kelissózder júrgizilýde eken.
Óz kezeginde oblys ákimi resýrstyq ortalyqtyń jumysyna qatysty birqatar eskertýler jasap, BQO ákimdigi apparatynyń basshysy Abat Shynybekovke basqarma jumysyn jandandyrýdy tapsyrdy.
– Búgingi tańda jastardy jumyspen qamtýǵa arnalǵan «Alǵashqy jumys», «Jastar tájirıbesi» baǵdarlamalary kóp. Bul baǵdarlamalar boıynsha kásipkerlerge keńinen túsindirý jumystaryn júrgizý qajet. Sondaı-aq qysqa merzimdi kýrstar bar, talap etilmegen mamandyqtar boıynsha mamandardy oqytýdyń qajeti joq, eńbek naryǵyna nazar aýdarý qajet, – dedi Ǵalı Esqalıev.
Oblystyq memlekettik satyp alý basqarmasy basshysynyń orynbasary Farıda Radjapova oblystaǵy 1204 nysannyń 334-in kásipkerlik sýbektilerine senimgerlik basqarýǵa berýge bolatynyn atap ótti. Sońǵy tórt jylda nysandardy jalǵa berýden túsken kiris shamamen 500 mıllıon teńgeni qurady. Al qala ákimi Mırjan Satqanov sońǵy eki jylda satyp alý quqyǵy joq 10 nysannyń qala ákimshiligine berilgenin aıtty. Osy ýaqyt ishinde bıýdjetke 12 mln. túsim túsken.
– Bıyl 32 nysan jalǵa berildi.Ótken segiz aıda bıýdjetke 18 mln. teńgege jýyq qarjy tústi. Jyl sońyna deıin taǵy úsh nysandy senimgerlik basqarýǵa berýdi josparlap otyrmyz, – dedi M.Satqanov.
Aǵymdaǵy jyldyń segiz aıynyń qorytyndysy boıynsha oblys joldarynda 205 jol-kólik oqıǵasy tirkelip, sonyń saldarynan 67 adam qaza taýyp, 251-i jaraqat alǵan. Bul týraly jıynda BQO DP basshysynyń birinshi orynbasary Janbolat Janshın baıandady.
– Jol-kólik oqıǵalarynyń negizgi sebebi – jyldamdyqty arttyrý, kólik júrgizý mádenıetiniń tómendigi jáne kólik júrgizý kezinde alkogoldi ishimdik ishý. Osylaısha, aǵymdaǵy jyldyń basynan beri manevr jasaý erejesin buzǵan 4144 júrgizýshi ákimshilik jaýapkershilikke tartylǵan. Jyldamdyqty arttyrý saldarynan 31 adam qaza taýyp, 166 júrgizýshige qarsy jolaqqa shyǵyp ketkeni úshin aıyppul salyndy Kóbinese úı janýarlary da jol-kólik oqıǵasyna kináli bolady. Óıtkeni, túnde jolda janýarlardy baıqaý óte qıyn. Aǵymdaǵy jyldyń basynan beri 1899 mal ıesi ákimshilik jaýapkershilikke tartylyp, 265-ine eskertý jasalyp, jalpy aıyppul somasy 8 mln. 151 myń 183 teńgeni qurap otyr.Bul faktiler mal baǵýdyń baqylaýsyz bolýyna baılanysty, – dedi J.Janshın.
Oblys ákimi aýdan ákimderi men veterınarııa organdaryna barlyq aýyl sharýashylyǵy janýarlaryn esepke alý boıynsha qajetti sharalardy qabyldaýdy tapsyrdy. Sonymen qatar, oblystyq jolaýshylar kóligi jáne avtomobıl joldary basqarmasyna avtojoldardaǵy bılbordtardy jańartý boıynsha usynystar berildi.
”Adyrna” ulttyq portaly
