Prezident Qasym-Jomart Toqaev QHR Töraǧasy Si Szinpinmen kezdeskende «Qytai – Qazaqstannyŋ eŋ ırı sauda serıktesı. Ortaq ırı jobalarymyz jüzege asyrylyp jatyr»,- dep aitqan bolatyn. Osyǧan orai, Memleket basşysynyŋ tarsyrmasyna säikes, Batys Qazaqstan oblysynda qytai käsıpkerlerımen 14 investisiialyq jobany jüzege asyru qolǧa alyndy.
Körşı eldıŋ investorlary energetika, auyl şaruaşylyǧy, densaulyq saqtau siiaqty bırqatar maŋyzdy salalarǧa jalpy qūny 134 milliard teŋgeden astam qarjy saluǧa niettı. Būl baǧytta ekı jaqty naqty kelısım bar. Endı sanauly künderden keiın ekı zauyttyŋ qūrylysy bastalady. Oǧan qajettı qūral-jabdyq tielgen konteinerlerdıŋ alǧaşqy legı Qytaidyŋ Veifan qalasynan elımızge qarai jöneltıldı.Aldymen industrialdy aimaqta quaty 34 megavatt bolatyn gaz elektr stansiiasy salynady. Būl joba keiıngı öndırıs oryndaryn tūraqty energiiamen qamtamasyz etuge baǧyttalǧan. Sonymen qatar mūnai katalizatorlaryn qaita öŋdeu zauytynyŋ qūrylysy bastalady.Zauytqa qajettı qondyrǧy Qazaqstanǧa jöneltıldı. Alǧaşqy jüktı tieu räsımıne Batys Qazaqstan oblysynyŋ äkımı Nariman Töreǧaliev bastaǧan delegasiia arnaiy qatysty.
«Memleket basşysy atap ötkendei, bız şikızatqa täueldı bolmai, öŋdeu önerkäsıbın, auyl şaruaşylyǧyn, öndırıstı damytuǧa erekşe män berıp otyrmyz. Būl jobalar öŋır ekonomikasynyŋ damuyna eleulı serpın beredı», - dedı Batys Qazaqstan oblysynyŋ äkımı Nariman Töreǧaliev.
Oblysta josparlanǧan 14 jobanyŋ bärın bır konsorsium atqarady. Qūramyndaǧy bırneşe kompaniia tek energetika salasyn ǧana emes, agrotehnika, mūnai, qūrylys, densaulyq saqtau salalaryn da investisiialaidy. Jūmysşy top Şandun provinsiiasyndaǧy keşendı aralap tyŋ tehnologiiamen tanysty.
Qytailyq «VEGA Power» kompaniiasynyŋ bas direktory Ge Szian joba kezeŋ-kezeŋımen jüzege asyrylyp, alǧaşqy kezeŋde 30 million AQŞ dollary kölemınde investisiia salynatynyn atap öttı. Sonymen qatar, bügınde alǧaşqy bes konteiner jöneltılgenın jäne joba tolyq jüzege asqanda 10-nan astam önım türı şyǧarylatynyn habarlady.
Oblys äkımı investorlarmen kezdesu barysynda naqty talaptardy da atady, olar: kompaniialar öŋırde tırkelıp, salyq tüsımı jergılıktı biudjetke baǧyttaluy tiıs; jergılıktı kadrlar jūmysqa ornalastyrylady; bolaşaq mamandardy oqytu investorlardyŋ qarajaty esebınen jürgızıluı tiıs.
Sonymen qatar, öŋır Qytaimen medisina salasy boiynşa bailanysty nyǧaitady. Osy maqsatta delegasiia iKang Guobin Checkup Center emhanasyna baryp, Qytaidyŋ densaulyq saqtau jüiesındegı zamanaui ädıstermen jäne medisinalyq qyzmet körsetudıŋ innovasiialyq ülgılerımen tanysty.
Aita ketu kerek, biyl alǧaşqy jartyjyldyqtyŋ qorytyndysy boiynşa Batys Qazaqstan oblysy tıkelei şeteldık investisiialar kölemı boiynşa respublikada 3-orynda tūr.Būl kezdesu Qazaqstan Respublikasynyŋ Qytai Halyq Respublikasyndaǧy Elşılıgınıŋ qoldauymen ūiymdastyryldy.
