Kemeldik pen keńdik dep jatamyz. Maqsat pen mindet kúlki emes, kórkem bolýy shart dep jatamyz. Mine, osy bir sharafaty mol túsinikterdi keıde men ultyma da teńegim keledi. Ult degenimiz – halyqtyń jetilgen, parasaty jetikken túri. Ózin-ózi saqtaýǵa, damytýǵa, qorǵaýǵa, qorlamaýǵa aıryqsha den qoıa alatyn qabilettiń túri.
Dostaevskıı aıtqan eken: «Qudaılar ultqa bólingende, olar óledi»,- deıdi. Demek, ultty uıystyratyn – dúnıetanym. Al ony azdyratyn, tozdyratyn – alaýyzdyq. Aıaǵy úzeńgiden shyqsa da, tizesi jerge tımegen alash jurty azapty ǵumyrynda uzyna tarıhynda basynda nebir dáýir ótkizdi. Aysyn da, tuysyn da sarqa tatty. Aysy tusynda jasqanyp, tuysy tusynda mastanyp kórgen emes. Jeńip te kórdi, jeńilip te kórdi. Biraq osyny seziný – saıası ómirdiń eń bir qıyn sátterinde bizge bir berik rýhanı medet bolǵandaı.
Búgingi aq ordaly Qazaqstan keshegi altyn ordalardyń tikeleı murageri. Táýelsizdik – yrys, damýdyń kepili. Al tiregi – birlik. Biraq búgin zaman basqa. Qarýdyń ornyna qalam, qalamnyń ornyna kompıýter kelgen zaman. Tehnologııanyń ózi kúnde ózgerip, ósip bara jatyr. Tolqyndy tolqyn qýady, tolqynnan tolqyn týady. Álem asyǵysta. Ómirdiń ózi kúnde ózgerip bara jatyr. Sondyqtan, ne ilgeri basasyń, keıin ketesiń. Basqa jol joq.
Mynaý saıasat degen termındi bizdiń dáýirimizge deıingi tórtinshi ǵasyrda Arıstotel engizgen eken. Ol ony memleketti basqarýdyń óneri dep atapty. Mine, osy jerde bizdiń aınalamyzdaǵy halyqaralyq saıası ahýaldy, ishki saıası ahýaldy nemese ultynyń únimen jurtynyń muńyn tamyrshydaı tap basyp otyrǵan memleket basshysy Qasym-Jomart Kemeluly Toqaev ultynyń únine ún qosa, oı tastady.
2019 jyl... «Syndarly qoǵamdyq dıalog Qazaqstannyń turaqtylyǵy men órkendeýiniń negizi»,- dep oıyn bastady. 2020 jyl... «Jańa jaǵdaıdaǵy Qazaqstan – is pen qımyldyń kezeńi» dep uran tastady. 2021 jyly «Halyq birligi jáne júıeli reformalar – el órkendeýiniń berik negizi», - dep oıyn jalǵastyrdy. Al 2022 jyldyń naýryzynda «Jańa Qazaqstan – jańarý men jańǵyrý joly»,- dep qadap kórsetti. Osydan birneshe kún buryn, 2022 jyly qyrkúıekte «Ádiletti memleket – birtutas ult, berekeli qoǵam», - dep úsh taǵandyq qaǵıdatty alǵa tartyp, halqyn ushpaqqa shaqyrdy. Tujyrym – bes joldaýy kýá memleket basshysy halyq jaǵynda, memleket jaǵynda ekendigin kórsetti.
Tipti, kúni keshe elimizde ótip jatqan álemdik jáne dástúrli dinder basshylarynyń jetinshi sezinde osy tezısin kóterip, ádiletti álem máselesin qozǵady. Rım papasyn qarsy alǵan kezde memleket basshysy «Siz bizdiń elge adamzattyq betburys kezinde keldińiz»,- dep parasatty oıyn jalǵady. Bes joldaýdyń ishinde halqynyń búkil muń-muqtajy atqaryldy. Biraq sonyń ishinde eń sońǵy joldaýdyń ataýynyń ózi kóńilge úlken senim uıalatady. «Ádiletti memleket – birtutas ult, berekeli qoǵam». Iakı, ádiletti memlekette turatyn birtutas ult berekeli qoǵamǵa kepil. Árıne, joldaýdyń ishinde shoqtyǵy bıik nebir sheshimder bar. Sonyń ishinde – halyq qorynan keleshek urpaqtarymyzǵa ashylatyn esepshot. Keshegi alpaýyttar pyshaq ústinen úlestirgen mıllıondaǵan gektar jer telimi memleketke qaıtaryldy. Qańtar oqıǵasy kezinde asa aýyr qylmys jasamaǵandarǵa keshirim.
Sondaı-aq, aldaǵy jarty jyl ishinde bıliktiń bar tarmaǵy – Prezıdent, Parlament, Úkimet túgeldeı saılaýdyń súzgisinen ótetin boldy. Eń ǵajaby – memleket basshysy áli prezıdenttik ókili bar bıligin saılaýǵa salǵaly otyr. Bir qarasań, ataly nar táýekel. Ekinshi jaǵynan, qaýipti qadam. Sheshimi – memleket basshysy memleket Qasym-Jomart Kemeluly Toqaev astyndaǵy taǵyn emes, halqynyń baıandy baǵyn oılaǵandyǵy dep bilemin. Kúni keshe qolyndaǵy bıligin sútti sıyrdaı qattap saýǵan zamanmen salystyrǵanda. Shákárim qajy aıtpaqshy, bul án burynǵy ánnen ózgerek bop shyqpaı ma?! Dál solaı! Bárekeldi!
Prezıdentimizdiń josparlary san salaly. Arman-murattaryn sapaly baspaldaqtarmen ákele jatyr. Árıne, munyń bárine ýaqyt kerek. Oılanýǵa ýaqyt kerek. Deı turǵanmen, pysyqtalǵan, qorytyndalǵan dúnıelerdiń barlyǵyn júzege asyrýǵabiz múmkindik berýimiz kerek. Bizdiń mindemiz – birtutas sanaly ult bolyp, berekeli qoǵam bolyp, sózinde pátýa, isinde tııanaq bar el basshysyna Qasym-Jomart Kemeluly Toqaevqa eń ıgilikti reformalaryn júzege asyrýyna mandat berýimiz kerek.
Bizdiń Prezıdent bilimdi de, bilikti, baısaldy basshy. Osynyń barlyǵyn oılaı kele, salystyra kele, sol Prezıdent bıliginiń ǵumyryn jeti jylǵa ákelgeni. Birinshiden, jeti jyl, negizi, bul qazaqta jaqsy san.
Qazaq aıtady, «Jetige kelgenshe, jerden taıaq jısiń». Bul – búldirshinniń aıaq basyp ketý kezeńi. Al esti, sanaly pendege jeti jyl aqyl toltyrý, bar tájirıbeni ortaǵa salý, halyqtyń búkil muń-muqtajyna tárk etý, sodan nátıje shyǵarý. Mine, osy oıdyń barlyǵy memleket basshysynyń qaperinde dep oılaımyn. Sondyqtan, osy sheshimdi halyq bolyp barlyǵy qoldaýda. Sondyqtan, bul sheshim túbegeıli aqıqat sheshim dep oılaımyn. Sheshimniń erteńi - halqymyzdyń rızyǵy.
Joǵymyzdy bardaı etý, barymyzdy dardaı etý – elimizge syn dep oılaımyn. Naızanyń ushyn tat basar, shoqparlar shoqqa tastalar, tolaıym zamanǵa da jetermiz. Táýelsizdigimiz baıandy, eldigimiz máńgilik bolǵaı! Tarıhtyń tar ótkelinen súrindirmeı ótkizgen babalar shapaǵaty bizge de tıgeı! Elimiz aman, jurtymyz tynysh bolsyn, aǵaıyn!
Dosqan JOLJAQSYNOV,
"Adyrna" ulttyq portaly
