Elimizde oqý jylynyń bastalýyna qaraı 80-ge jýyq jańa mektep ashylady. Jyl sońyna deıin barlyǵy 230-dan astam mektepti paıdalanýǵa berý josparlanyp otyr. Bul týraly QR Oqý-aǵartý mınıstrliginiń baspasóz qyzmeti jarııalady, dep habarlaıdy "Adyrna" ulttyq portaly.
«Memleket basshysynyń tapsyrmasy boıynsha 2025 jyldyń sońyna deıin elimizde 1 000 mektep salynady. Byltyr 277 mektep paıdalanýǵa berildi. Bıyl taǵy 230 mektepti ashý josparlanyp otyr. 1 qyrkúıekke deıin 80 mektep ashylady. Qazir jergilikti atqarýshy organdarmen birlese otyryp, qalǵan mektepterdiń qurylysyn merziminde aıaqtaý úshin jumys júrgizip jatyrmyz. Mektepterdi qarjylandyrý jáne onyń qurylysy zańdy túrde ákimdikterdiń quzyrynda ekenin eske sala keteıik. Memlekettik satyp alýlar, jobalyq-smetalyq qujattardy daıyndaý, jer telimderin bólý, ınjenerlik ınfraqurylym, qurylys jáne iske qosý – jergilikti ákimdikterge júktelgen osy úrdistiń barlyǵyn qarap, ońtaılandyrý qajet, qazir onymen arnaıy jumys toby aınalysyp jatyr. Naqty qurylys salý, ákimdikterdiń mektep salmaı úı salýǵa ruqsat berý tájirıbesi - ol bólek másele. Sonyń saldarynan qazirgi mektepter birden úsh aýysymǵa aınalady. Biz zań júzinde mundaı múmkindikti tolyǵymen joıýdy talap etemiz», - dedi Oqý-aǵartý vıe-mınıstri Ǵanı Beısembaev.
Jańa mekteptiń basym kópshiligi demografııalyq ósim belsendi jáne oqýshylar orny jetkiliksiz aımaqtarda salynyp jatyr. Bul Almaty, Atyraý oblystary jáne Nur-Sultan, Almaty qalalary.
Óńirlerde de 200-den astam mektepke kúrdeli jóndeý jumystary aıaqtalýǵa jaqyn.
"Adyrna" ulttyq portaly
