ەلىمىزدە 1 قىركۇيەك قارساڭىندا 80-گە جۋىق جاڭا مەكتەپ اشىلادى

1742
Adyrna.kz Telegram
فوتو: crimeantatars.club
فوتو: crimeantatars.club

ەلىمىزدە وقۋ جىلىنىڭ باستالۋىنا قاراي 80-گە جۋىق جاڭا مەكتەپ اشىلادى. جىل سوڭىنا دەيىن بارلىعى 230-دان استام مەكتەپتى پايدالانۋعا بەرۋ جوسپارلانىپ وتىر. بۇل تۋرالى قر وقۋ-اعارتۋ مينيسترلىگىنىڭ ءباسپاسوز قىزمەتى جاريالادى، دەپ حابارلايدى "ادىرنا" ۇلتتىق پورتالى.

«مەملەكەت باسشىسىنىڭ تاپسىرماسى بويىنشا 2025 جىلدىڭ سوڭىنا دەيىن ەلىمىزدە 1 000 مەكتەپ سالىنادى. بىلتىر 277 مەكتەپ پايدالانۋعا بەرىلدى. بيىل تاعى 230 مەكتەپتى اشۋ جوسپارلانىپ وتىر. 1 قىركۇيەككە دەيىن 80 مەكتەپ اشىلادى. قازىر جەرگىلىكتى اتقارۋشى ورگاندارمەن بىرلەسە وتىرىپ، قالعان مەكتەپتەردىڭ قۇرىلىسىن مەرزىمىندە اياقتاۋ ءۇشىن جۇمىس جۇرگىزىپ جاتىرمىز. مەكتەپتەردى قارجىلاندىرۋ جانە ونىڭ قۇرىلىسى زاڭدى تۇردە اكىمدىكتەردىڭ قۇزىرىندا ەكەنىن ەسكە سالا كەتەيىك. مەملەكەتتىك ساتىپ الۋلار، جوبالىق-سمەتالىق قۇجاتتاردى دايىنداۋ، جەر تەلىمدەرىن ءبولۋ، ينجەنەرلىك ينفراقۇرىلىم، قۇرىلىس جانە ىسكە قوسۋ – جەرگىلىكتى اكىمدىكتەرگە جۇكتەلگەن وسى ءۇردىستىڭ بارلىعىن قاراپ، وڭتايلاندىرۋ قاجەت، قازىر ونىمەن ارنايى جۇمىس توبى اينالىسىپ جاتىر. ناقتى قۇرىلىس سالۋ، اكىمدىكتەردىڭ مەكتەپ سالماي ءۇي سالۋعا رۇقسات بەرۋ تاجىريبەسى - ول بولەك ماسەلە. سونىڭ سالدارىنان قازىرگى مەكتەپتەر بىردەن ءۇش اۋىسىمعا اينالادى. ءبىز زاڭ جۇزىندە مۇنداي مۇمكىندىكتى تولىعىمەن جويۋدى تالاپ ەتەمىز»، - دەدى وقۋ-اعارتۋ ۆيتسە-ءمينيسترى عاني بەيسەمباەۆ.

جاڭا مەكتەپتىڭ باسىم كوپشىلىگى دەموگرافيالىق ءوسىم بەلسەندى جانە وقۋشىلار ورنى جەتكىلىكسىز ايماقتاردا سالىنىپ جاتىر. بۇل الماتى، اتىراۋ وبلىستارى جانە نۇر-سۇلتان، الماتى قالالارى.

وڭىرلەردە دە 200-دەن استام مەكتەپكە كۇردەلى جوندەۋ جۇمىستارى اياقتالۋعا جاقىن.

"ادىرنا" ۇلتتىق پورتالى

پىكىرلەر