Türkıstan qalasyndaǧy «Kongress holl» keşenınde «Saqşy» interaktivtı oiyny men äleumettık beinerolikter baiqauynyŋ qorytyndy marapattau räsımı öttı.
Tört sanat boiynşa 12 jüldeger anyqtalyp, baǧaly syilyqtarmen marapattaldy. Sondai-aq beinerolikterdı äzırleuge atsalysqan 150 oquşyǧa alǧys hattar men syilyqtar tabystaldy.
Saltanatty ıs-şaraǧa Türkıstan oblysynyŋ äkımı Nūralhan Köşerov, Qazaqstan Respublikasy Qarjylyq monitoring agenttıgınıŋ Prevensiia jäne taldau äzırlemelerı departamentınıŋ basşysy Däuren Raiymqūlov, Türkıstan oblysy boiynşa Ekonomikalyq tergep-tekseru departamentınıŋ basşysy Sabyrǧali Balǧaliev, qūqyq qorǧau organdary men bılım salasynyŋ ökılderı, ūstazdar, ata-analar jäne jastar qatysty.
Oblys äkımı jastar arasynda zaŋǧa qūrmet pen jauapkerşılık mädenietın qalyptastyrudyŋ maŋyzdylyǧyna toqtaldy.
– Memleket basşysy Qasym-Jomart Kemelūly Toqaev qoǧamda «Zaŋ men tärtıp» qaǧidatyn ornyqtyrudy memlekettık saiasattyŋ basym baǧyttarynyŋ bırı retınde aiqyndady. Osy oraida zaŋǧa qūrmet otbasydan bastalyp, mektepte jalǧasyp, qoǧamdaǧy kündelıktı qarym-qatynasta körınıs tabuy tiıs. Türkıstan oblysynda atalǧan baǧytta keşendı jūmystar jürgızılude. Sonyŋ jarqyn ülgısı – Ekonomikalyq tergep-tekseru departamentınıŋ bastamasymen jüzege asyrylyp jatqan «Saqşy» innovasiialyq profilaktikalyq jobasy. Joba aiasynda qarjylyq qauıpsızdık, internet-alaiaqtyqtan saqtanu, qūqyq būzuşylyqtyŋ aldyn alu mäselelerı keŋınen qamtylǧan. Qūrmettı jastar! Bügıngı taŋda erekşe nazar audarudy qajet etetın özektı mäselenıŋ bırı – jasöspırımder men jastar arasynda bulling faktılerınıŋ aldyn alu. Ömırde türlı qiyndyqtar men kedergıler kezdesedı. Bıraq solarǧa moiymai, alǧa ūmtylu maŋyzdy. Bız jastar arasynda özara syilastyqty, bır-bırıne qoldau körsetu jäne qūrmetteu mädenietın qalyptastyruymyz qajet. Bılımge ūmtylmai, tärtıp būzu men būzaqylyqqa boi aldyru – bolaşaqqa balta şabumen teŋ. Mūndai jaǧymsyz äreketter ata-analaryŋnyŋ ümıtın üzetın, olardyŋ jüregın jaralaityn ıs. Sondyqtan zaŋ men tärtıptı saqtap, ǧylymǧa, önerge, sportqa ūmtylyŋyzdar! Bızdıŋ basty maqsatymyz – zaŋdy qūrmetteitın, öz qūqyǧy men mındetın bıletın, ruhani bai, bäsekege qabılettı jäne jauapkerşılıgı joǧary ūrpaq tärbieleu. Būl baǧytta memlekettık jäne qūqyq qorǧau organdary, bılım beru ūiymdary, ata-analar men azamattyq qoǧam ökılderı özara üilesımdı jūmys ısteuı qajet. «Saqşy» jobasy – osy maqsattaǧy jūmystyŋ nätijelı ülgısı. Bügıngı baiqau jeŋımpazdary men jüldegerlerın şyn jürekten qūttyqtaimyn! Barşaŋyzǧa zor densaulyq, otbasylaryŋyzǧa amandyq, şyǧarmaşylyq tabys tıleimın! – dedı Nūralhan Köşerov.
«Saqşy» jobasyn Türkıstan oblysy boiynşa Ekonomikalyq tergep-tekseru departamentı «Zaŋ men tärtıp» qaǧidaty men «Adal azamat» tūjyrymdamasy aiasynda äzırlep, ūiymdastyrdy. Is-şarany ötkızuge Türkıstan oblysy äkımdıgı men Bılım basqarmasy qoldau körsettı. Bastamanyŋ negızgı maqsaty – öskeleŋ ūrpaqtyŋ qarjylyq qauıpsızdık daǧdylaryn qalyptastyru, zaŋǧa qūrmetpen qarauǧa üiretu jäne jeke şeşımderı üşın jauapkerşılıgın arttyru.

İnteraktivtı oiyn barysynda qatysuşylar kündelıktı ömırde kezdesetın qarjylyq qauıpterdı taldap, alaiaqtyq äreketterdı anyqtau joldaryn üirendı. Mäselen, «Bank kartaŋdy bere tūr, aqşa audarǧanyŋ üşın syiaqy alasyŋ» degen sekıldı kümändı ūsynystardyŋ astarynda qandai qauıp jatqanyn zerdeledı. Oquşylar men studentter jeke derekterdı qorǧau, bank kartalaryn zaŋsyz maqsatta paidalanuǧa jol bermeu jäne kümändı qarjylyq operasiialardan saqtanu boiynşa bılımderın jetıldırdı.
Jobanyŋ taǧy bır baǧyty – äleumettık beinerolikter baiqauy. Oǧan qatysqan oquşylar qarjylyq alaiaqtyqtyŋ joldaryn, onyŋ zardaptaryn jäne saqtanu täsılderın özderı zerttep, ssenarii äzırlep, şyǧarmaşylyq jūmystar ūsyndy.
Baiqaudyŋ «Alǧaşqy karta» sanatynda Alimov Nūraly I oryn, Nūraly Kenesary II oryn, Berkınbai Saian III oryndy ielendı. «Qarjylyq monitoring» sanatynda Rüstemūly Mūhamedqanapiia I oryn, Tıleubek Mūhammediar II oryn, Ahmetbek Alihan III orynǧa laiyq dep tanyldy. «Aqyldy saqşy» sanatynda Ordabai Aişa I oryn, Orazaly Perizat II oryn, Naqypbek Aisūltan III oryndy ielense, «Jeŋıl aqşa» sanaty boiynşa Myrzahoja Şūǧyla top jardy. Al Balqybekov Bekasyl II oryndy enşılese, Baltabai Janiia III oryn jüldegerı atandy.

Sonymen qatar jobany ūiymdastyruǧa jäne ötkızuge qosqan ülesı üşın bılım salasynyŋ 5 ökılı marapattaldy.
Is-şara mazmūndy qoiylymdarmen jäne konserttık baǧdarlamamen tolyqty. Onda oblys pen elımızdıŋ önerpazdary öner körsettı.

