Tájikstannyń bir top turǵyny el prezıdenti Emomalı Rahmonǵa ashyq hat jazyp, segiz jylǵa bas bostandyǵynan aıyrylǵan jýrnalıst Rýhshona Hakımovanyń jazasyn jeńildetýdi ótindi. «Azııa-Plıýs» basylymynyń habarlaýynsha, hatqa shamamen 130 belsendi áıel qol qoıǵan, dep habarlaıdy "Adyrna" ulttyq portaly Ferǵanaǵa siltep.
Qoǵam belsendileri Hakımovanyń sottalýy onyń eki kishkentaı qyzyna aýyr soqqy bolǵanyn atap ótti. Olardyń biri áli emshektegi sábı.
"Bul úkim bizdi tereń kúızeliske ushyratty. Biraq eń bastysy – bul sheshim onyń eki kishkentaı qyzy – Shahnýra men Shýkronanyń ómirin túbegeıli ózgertti. Olar anasynan aıyrylyp, meıiriminen, qamqorlyǵynan, jylýynan qaǵyldy", – delingen hatta.
Hat avtorlary Hakımovanyń jazasyn jeńildetýdi ǵana surap otyrǵanyn atap ótti. Olardyń oıynsha, zań aıasynda anaǵa balalarymen birge bolýǵa múmkindik beretin gýmanıtarlyq sheshim qabyldaýǵa bolady.
"Biz zańda ananyń jaǵdaıyn eskerip, onyń kishkentaı balalaryn anasynan aıyrmaıtyn quqyqtyq tetikter bar dep senemiz", – deıdi olar.
Ótken jyly Tájikstanda bılikti kúshpen basyp alýǵa árekettendi degen kúdikpen saıasatkerler men arnaıy qyzmettiń burynǵy qyzmetkerleri jappaı tutqyndaldy. Qarasha aıynda olardyń isi boıynsha sot proesi bastalyp, 5 aqpanda barlyq aıyptalýshylarǵa uzaq merzimdi túrme jazasy taǵaıyndaldy.
Jýrnalıst Rýhshona Hakımova memleketke opasyzdyq jasady dep tanylyp, 8 jylǵa bas bostandyǵynan aıyryldy. Sot sheshimi shyqqanǵa deıin onyń eki balasy bar bolǵandyqtan ol bostandyqta júrgen. Alaıda úkim jarııalanǵannan keıin sot zalynda qamaýǵa alyndy.
Tájikstandyq BAQ málimetinshe, Hakımovanyń isi "Qytaıdyń Tájikstanǵa yqpaly" týraly júrgizgen saýalnamasymen baılanysty. Bul saýalnamaǵa osy is boıynsha sottalǵan Saıddjafar Ýsmonzoda (27 jyl) jáne Hakımovanyń týysy Shokırdjon Hakımov (18 jyl) qatysqan.
Belsendiler úkimetten ádiletti sheshim kútip otyr.
