Baıden men Pýtın telefon arqyly sóılesti. Qońyraý shalý Vashıngton tarapynyń bastamasymen iske asqan.
1. Baıden Ýkraına shekarasynda Reseı áskeriniń kóptep ornalasa bastaýyna alańdaýshylyq bildirgen.
2. Baıden Reseı prezıdentine jaqyn aılarda úshinshi bir memlekette kezdesýdi usynǵan.
Reseı tarapy eki prezıdent sóılesýinde AQSh-tyń Iran men Aýǵanstan suraqtary boıynsha Reseımen birlese jumys isteýge daıyn ekenin aıtqanyn jarııa etti.
Zelenskıı Máskeýge telefon soqsa Pýtın tutqany kótermedi. Pýtın Ýkraına taqyryby boıynsha Baıdenmen sóılesip jatyr. ZE-ni saıasatker dep eseptep júrgen joq. Bul Ýkraına máselesin AQSh pen Reseı prezıdentteri ózara sheship jatyr degen sóz.
Iran men Aýǵanstan týraly da sóz bolypty. Ne aıtylǵany, aldaǵy ýaqytta kezdesse qandaı kelisimge keleri belgisiz qoǵamǵa. Eger ekeýi Iran, Aýǵanstan, Sırııa máselelerinde ózara kelisip, múddelerin qorǵap, yqpal etý aımaqtaryn bólisip, Ýkraınany obmenge aýystyra salsa she?...
Ýkraına qoǵamy, prezıdenti memleketi týraly aıtqanda "Bizdiń derjava", "Biz myqtymyz" degen sózdi jıi qoldanady. Biraq Ýkraına derjavasynyń keleshegin AQSh pen Reseı syndy álemdik derjavalar ózara kelisip sheship jatyr.
Bizdiń basqa mundaı kún túspesin. Prezıdentiń telefon soqsa almaı, eki derjava seniń elińniń bolashaǵy týraly ózara kelissóz júrgizip jatsa mundaıdy kótere almaı jarylyp ketemiz biz. "Tekti qazaq", "Uly dala", atqa minip tý ustap shabamyz degen sózderimiz bos sóz, bos sóz bolyp qalady. Realızm. Geosaıasat basqa kartalarmen oınaıdy. Sabaq alatyn dúnıe.
Baýyrjan SERIKBAEV,
"Adyrna" ulttyq portaly
