Erteńnen bastap elimizdiń 20 óńirinde Senat depýtattyǵyna kandıdattardy usyný bastalady. Bul týraly QazAqparat habarlady, dep jazady “Adyrna” ulttyq portaly.
QR Ortalyq saılaý komıssııasy tóraǵasynyń orynbasary Konstantın Petrovtyń málimdeýinshe, kandıdattardy usyný erteń bastalady.
«Kandıdattardy usyný saılaý taǵaıyndalǵan kúnniń erteńinde bastalady. Búgin «Egemen Qazaqstan» jáne «Kazahstanskaıa pravda» gazetterinde Jarlyqtyń mátini resmı túrde jarııalandy. Iaǵnı, búginnen bastap Jarlyq kúshine enedi. Soǵan oraı kandıdattardy usyný erteńnen bastalyp, daýys berýge 1 aı qalǵanǵa deıin saǵat 18-00-de, ıaǵnı, 14 jeltoqsan kúni jergilikti ýaqytpen saǵat 18-00-de aıaqtalady. Senat depýtattyǵyna kandıdattardy tirkeý barlyq qajetti qujattardy alǵan sátten bastalyp, daýys berýge 20 kún qalǵanda jergilikti ýaqytpen saǵat 18-00-de támamdalady. Kandıdattardy tirkeý barlyq qujattar alynǵannan keıin júrgiziledi», - dedi ol búgin OSK otyrysynda.
Onyń atap ótýinshe, Senat depýtattyǵyna kandıdattardy oblystardyń, respýblıkalyq mańyzy bar qalalardyń jáne astananyń saılaý komıssııalary qajetti qujattary túgel jáne saılaý jarnasy tólengen kezde tirkeıdi.
«Búginde saılaý jarnasy 900 myń teńgeni quraıdy. Bul konstıtýııalyq zańda 15 eń tómengi aılyq mólsherinde aıqyndalǵan jarnaǵa saı keledi. Qazirgi ýaqytta eń tómengi aılyq 60 myń teńgeni quraıdy. Saılaý aldyndaǵy úgit 19 kúnge sozylady. Ol kandıdattardy tirkeý aıaqtalǵan sátten bastalyp, saılaý qarsańyndaǵy kúni jergilikti ýaqyt boıynsha 00-00-de aıaqtalady. Iaǵnı, úgit jumystary 24 jeltoqsan kúni saǵat 18-00-den 2023 jyldyń 13 qańtar kúni saǵat 00-00-ge deıin júrgiziledi», - dedi Konstantın Petrov.
OSK tóraǵasy orynbasarynyń dereginshe, Senat depýtattaryn saılaý tańdaýshylardyń birlesken otyrysynda ótedi jáne olardyń 50 paıyzdan astam qatysqan kezde saılaý ótti dep sanalady. Al daýys berýge qatysqan tańdaýshylardyń 50 paıyzdan astamynyń qoldaýyna ıe bolǵan kandıdat Senat depýtaty bolady.
«Jalpy, naýqan búginnen bastap, 14 qańtarǵa deıin jalǵasady. Kandıdattardy usyný merzimi 16 kúndi, tirkeý merzimi – 26 kúnge deıingi ýaqytty quraıdy. Saılaýaldy úgit jumystary 19 kúnge sozylady. Tynyshtyq kúni – 13 qańtar. Daýys berý kúni – 14 qańtar. OSK 7 kúnniń ishinde, ıaǵnı, 20 qańtardan keshiktirmeı saılaý nátıjesin anyqtap, buqaralyq aqparat quraldarynda saılaý qorytyndylary týraly aqparat jarııalaıdy», - dedi ol.
“Adyrna” ulttyq portaly
