Batys Qazaqstan oblysy boiynşa Memlekettık kırıster departamentı basqarmasynyŋ būrynǧy mındetın atqaruşy para alǧany üşın 10 jylǧa bas bostandyǧynan aiyryldy. Būl turaly Astananyŋ qylmystyq ıster jönındegı mamandandyrylǧan audanaralyq soty habarlady, dep jazady “Adyrna”.
Sot ükımıne säikes, sottaluşy Reseiden Qazaqstanǧa jük kölıkterınıŋ şekaradan kedergısız ötuın qamtamasyz etu üşın 100 mln teŋge (221 myŋ AQŞ dollary) kölemınde para alǧan.
Sot anyqtaǧandai, 2025 jyldyŋ qyrküiek–qazan ailarynda şeneunık Resei azamatynyŋ jük tasymalyna Batys Qazaqstan oblysyndaǧy ötkızu beketterı arqyly kedergısız ötuıne jaǧdai jasau jönınde kelısımge kelgen.
Ol para üşın Reseiden Qazaqstanǧa 1003 jük kölıgınıŋ eş kedergısız ötuın qamtamasyz etuge uäde bergen.
Sonymen qatar, şeneunık tasymaldauşy kompaniialar men jeke käsıpkerlerdıŋ Täuekelderdı basqaru jüiesıne engızılgenı turaly aqparat berıp, osyǧan bailanysty qoiylǧan şekteulerdı ainalyp ötu joldaryn körsetıp otyrǧan.
Aqşa oǧan deldal arqyly berılgen. Deldal būl qyzmetı üşın 24,8 mln teŋge (55 myŋ AQŞ dollary) alǧan.
Memlekettık aiyptauşy būrynǧy memlekettık qyzmetkerdı 12 jylǧa, al deldaldy 1 jyl 6 aiǧa bas bostandyǧynan aiyrudy sūraǧan.
Sot ekı sottaluşynyŋ da kämeletke tolmaǧan balalary bar ekenın jeŋıldetetın män-jai retınde eskerdı. Al būrynǧy şeneunıkke qatysty auyrlatatyn män-jai retınde onyŋ antyn būza otyryp qylmys jasaǧany tanyldy.
Nätijesınde, Departamenttıŋ būrynǧy qyzmetkerı 10 jylǧa, al deldal 1 jyl 6 aiǧa bas bostandyǧynan aiyryldy. Ekeuınıŋ de mülkı tärkılenıp, belgılı bır lauazymdardy atqaruǧa ömır boiyna tyiym salyndy.
Sondai-aq sot qylmystyq jolmen alynǧan dep tanylǧan aqşany memleket kırısıne tärkıleu jäne sottalǧandardan zaŋsyz alynǧan qarajatty öndırıp alu turaly şeşım şyǧardy.
Äzırge sot ükımı zaŋdy küşıne engen joq.
Qazaqstan men Resei şekarasynda jük kölıkterınıŋ ūzyn-sonar kezegı jiı paida bolady. Ädette būl jaǧdai ekı eldıŋ keden qyzmetterınıŋ jūmysyna bailanystyrylady. Alaida tiıstı vedomstvolar mūny joqqa şyǧaryp, kölık aǧynynyŋ artuymen tüsındıredı.
Äsırese, 2025 jyldyŋ küzınde jaǧdai kürdelene tüstı. Sol kezde Resei men Qazaqstan şekarasynda myŋdaǧan jük kölıgı keptelıp qalǧan bolatyn.
Sol kezde sarapşylar būl jaǧdaiǧa Qazaqstan men Resei taraptarynyŋ «köleŋkelı» importpen kürestı bır mezgılde küşeituge degen ūmtylysy sebep boluy mümkın ekenın aitqan edı.
