Foto: Sammer AI-Doumy/AFP
Fransiiada 31 qazan qatarynan üşınşı senbıde ötken jappai narazylyq aksiialary kezınde 565 adam ūstaldy. Eldıŋ Işkı ıster ministrlıgınıŋ mälımetınşe, şerulerge 320 myŋ adam qatysqan. Būl turaly AFP agenttıgı habarlady, dep jazady “Adyrna”.
Ministr Loran Nunestıŋ aituynşa, demonstrasiialar negızınen beibıt ötken. Alaida ultrasolşyl toptardyŋ ökılderı qūqyq qorǧau organdaryna qarsy zorlyq-zombylyq körsetken.
Bilık mälımetınşe, Parijde narazylyq aksiialaryna 70 myŋ adam qatysqan. Al şerudı ūiymdastyruşylar el boiynşa köşege şyqqandardyŋ sany 500 myŋǧa juyqtaǧanyn aitady. Narazylyq bıldıruşıler ömır süru qūnynyŋ ösuıne jäne bılım beru salasyndaǧy mäselelerge qarsylyq tanytqan.
Fransiia boiynşa qoǧamdyq tärtıptı qamtamasyz etuge 70 myŋ polisei jūmyldyryldy. Parijde polisiiamen bolǧan qaqtyǧystar kezınde bes qūqyq qorǧau organy qyzmetkerı jaraqat alǧan. Olardyŋ üşeuı «Molotov kokteilınen» zardap şekken. Bır poliseidıŋ kiımı örtenıp, aiaǧy küigen.
Elordada narazylyq bıldıruşıler poliseilerge tas pen bruschatka laqtyrǧan. Būǧan jauap retınde qūqyq qorǧau organdary közden jas aǧyzatyn gaz ben taiaq qoldanǧan.
Tuluzada rūqsat etılmegen aksiiaǧa qatysuşylarǧa qarsy su şaşatyn kölıkter men közden jas aǧyzatyn gaz qoldanyldy. Marselde şamamen 10 myŋ adam qatysqan şeru qaqtyǧysqa ūlasqan. Lionda da polisiiamen qaqtyǧystar tırkelıp, tärtıpsızdıkke qatysuşylarǧa qarsy közden jas aǧyzatyn gaz qoldanylǧan.
Fransiiadaǧy jalpyhalyqtyq demonstrasiialar qyrküiek aiynyŋ soŋynda mektep oquşylary men studentterdıŋ narazylyǧynan bastalǧan. Oǧan mūǧalımderdıŋ jetıspeuı, synyptardaǧy oquşylar sanynyŋ köptıgı, oqu künınıŋ ūzaqtyǧy, mektep ǧimarattarynyŋ eskıruı jäne zamanaui jabdyqtardyŋ bolmauy sebep bolǧan.
Sonymen qatar jastar joǧary oqu oryndaryna tüsu kezındegı qiyndyqtar men bolaşaqtaryna alaŋdauşylyq bıldırgen.
Keiın narazylyqtarǧa basqa da äleumettık mäselelerge köŋılı tolmaityn azamattar qosylǧan. Sonyŋ saldarynan keibır aksiialar tärtıpsızdıkke ūlasyp, köşelerde kölıkter men qoqys jäşıkterı örtengen. Polisiiamen qaqtyǧystar, vandalizm jäne tonau oqiǧalary tırkelgen.
Fransiiadaǧy narazylyqtar Europanyŋ basqa elderındegı jastarǧa da äser etken. İtaliia, Germaniia jäne Belgiiada da osyndai aksiialar ötken. 31 qazanda Germaniianyŋ ırı qalalarynda jastardyŋ narazylyǧy tärtıpsızdıkke ūlasqan.
Degenmen Fransiiadaǧy narazylyqtarǧa qatysuşylar sany bırtındep azaiyp keledı. Bilıktıŋ baǧalauynşa, 17 qazanda köşege 550 myŋ adam şyqsa, 24 qazanda olardyŋ sany 410 myŋ bolǧan.
