"Saılaýda básekelestik jetispedi". Bul týraly EQYU Demokratııalyq ınstıtýttar jáne adam quqyqtary bıýrosynyń saılaýdy baqylaý mıssııasynyń jetekshisi Ýrsýla Gachek EQYU baqylaýshylary ótkizgen baspasóz máslıhaty barysynda málimdedi, dep jazady "Adyrna" ulttyq portaly baq.kz-ke silteme jasap.
Aıtýynsha, mıssııa jumysyna saılaýdan bir aı buryn kirisken.
Biz qazannyń ortasynan beri jumys isteı bastadyq. Saılaý kúni 300-deı baıqaýshy boldy. Olar Qazaqstan Respýblıkasynyń barlyq aýmaǵynda ornalasty. Saılaý oryndarynyń ashylýyn baqylady. Jalpy aıtqym keletini, saılaý tek qana bir kúndik jumyspen shektelmeıdi. Iaǵnı bizdiń mıssııamyzdyń jumysy bir kún ǵana tekserip qoıýdan turmaıdy. Qazaqstandaǵy kezekten tys prezıdent saılaýynda básekelestik jetispedi. Saılaý týraly normatıvtik quqyqtardy halyqaralyq standarttarǵa jáne EQYU mindettemelerine sáıkestikke keltirý qajet ekenin kórsetti, -dep atap ótti baqylaý mıssııasynyń jetekshisi.
Sonymen qatar ol qazirgi prezıdent parlamenttik partııalardyń birlesken kandıdaty retinde saılaýǵa túskendigin alǵa tartty.
Qazirgi prezıdent parlamenttik partııalardyń birlesken kandıdaty retinde saılaýǵa tústi jáne shynyn aıtqanda, is júzinde oǵan naýqan kezinde úlken synaq bolǵan joq. Baıqaýshylardyń aıtýynsha, azamattardyń tolyq qatysý qabileti aıtarlyqtaı shekteýli bolyp qala beredi. Sonyń ishinde negizgi bostandyqtardyń shekteýlerine baılanysty saılaý organdary saılaýshylarǵa BAQ arqyly aqparat berdi. Alaıda buqaralyq aqparat quraldarynda saılaý naýqanyn az jarııalaý jáne analıtıkalyq-taldamalyq derekterdiń bolmaýy saılaýshylardyń sanaly túrde tańdaý jasaý múmkindigin shektedi, - dedi Ýrsýla Gachek.
"Adyrna" ulttyq portaly
