Şymkent qalasynyŋ Qainarbūlaq jäne Nūrsät şaǧynaudandarynda angar ülgısındegı ekı moduldı sport zalynyŋ qūrylysy aiaqtaldy. Jaŋa nysandar būqaralyq sportpen şūǧyldanuǧa mümkındık berıp, äsırese balalar men jasöspırımderdıŋ sportqa qyzyǧuşylyǧyn arttyruǧa baǧyttalǧan.
Nysandardyŋ aşylu saltanatyna qala äkımı Ǧabit Syzdyqbekov jäne «Qazaqstan halqyna» qoǧamdyq qory basqarmasynyŋ töraiymy Läzzat Şyŋǧysbaeva qatysty.
«Är şaǧynaudannyŋ tūrǧyndary tūraqty jattyǧyp, densaulyǧyn nyǧaituǧa, belsendı ömır saltyn ūstanuǧa mümkındık aluy maŋyzdy. Bız sport nysandarynyŋ qoljetımdılıgıne erekşe nazar audara otyryp, qalanyŋ sport infraqūrylymyn damytudy jalǧastyramyz», – dedı Ǧabit Syzdyqbekov.
Aita keteiık, moduldı nysandardyŋ qūrylysy 2025 jyldyŋ qaraşa aiynda bastalǧan. Jobalar «Qazaqstan halqyna» qoǧamdyq qorynyŋ qoldauymen jüzege asyrylyp, megapoliske syilyq retınde berılıp otyr.
Sport zaldary basketbol, voleibol jäne şaǧyn futbol oinauǧa qajet qūral-jabdyqtarmen qamtylǧan. Mūnda ūldar men qyzdarǧa arnalǧan kiım auystyru bölmelerı, duş kabinalary, jattyqtyruşylarǧa arnalǧan bölmeler jäne 50 körermenge arnalǧan oryndar qarastyrylǧan. Sondai-aq, kün salqyn mezgılde jattyǧuǧa qolaily boluy üşın jylytu jüielerı ornatylǧan.
Osylaişa jaŋa sport nysandary tūrǧyndarǧa üiıne jaqyn jerde dene şynyqtyrumen ainalysuǧa mümkındık beredı. Būl būqaralyq sportty keŋınen nasihattauǧa jäne salauatty ömır saltyn qalyptastyruǧa yqpal etedı.
