Qyrǧyzstan prezidentınıŋ baspasöz hatşysy Asqat Alagözov qaita esepteu nätijesınde VI Düniejüzılık köşpendıler oiyndaryndaǧy medaldar esebınde Qazaqstan bırınşı oryn alǧanyn mälımdedı, dep habarlaidy «Adyrna» tılşısı.
Aituynşa, Köşpendıler oiyndary joǧary deŋgeide ötıp, ülken sporttyq merekemen qorytyndylanǧan.
Alagözov sporttyq bäsekelestıktıŋ tek jarys alaŋynda qalǧanyn, al ekı eldıŋ janküierlerı arasynda eşqandai tüsınıspeuşılık bolmaǧanyn atap öttı.
Ol medaldar esebıne qatysty jaǧdaiǧa da tüsınıkteme berdı. Onyŋ aituynşa, jalǧyz tehnikalyq aiyrmaşylyq medaldardy esepteu kezınde bolǧan.
Bügın ūiymdastyru komitetı Qazaqstannyŋ üş sportşysynyŋ ärqaisysy jeŋıp alǧan medaldardy jeke esepke alu turaly şeşım qabyldaǧan. Qaita esepteu nätijesınde jalpy komandalyq esepte bırınşı oryndy Qazaqstan ielengen.
«Qazaq bauyrlarymyzdy jeŋısımen qūttyqtaimyz», — dedı prezidenttıŋ baspasöz hatşysy.
Ol Qyrǧyzstan sportşylarynyŋ da laiyqty öner körsetıp, özderınıŋ küşı men şeberlıgın tanytqanyn aitty.
Alagözovtıŋ naqtylauynşa, medaldar esebı — jarystyŋ bır ǧana qūramdas bölıgı. Ol Oiyndardyŋ basty nätijesı jarystardyŋ özara qūrmet pen adal bäsekelestık jaǧdaiynda ötuı, sondai-aq qyrǧyz jäne qazaq halyqtarynyŋ bırlıgın körsetuı bolǧanyn atap öttı.
Eske salaiyq, VI Düniejüzılık köşpendıler oiyndary Qyrǧyzstanda 31 tamyz ben 6 qyrküiek aralyǧynda ötken edı.
Būǧan deiın Qyrǧyzstan tarapy jarystarda resmi medaldyq jäne jalpykomandalyq esep jürgızılmeitının mälımdegen.
