قىرعىزستان پرەزيدەنتىنىڭ ءباسپاسوز حاتشىسى اسقات الاگوزوۆ قايتا ەسەپتەۋ ناتيجەسىندە VI دۇنيەجۇزىلىك كوشپەندىلەر ويىندارىنداعى مەدالدار ەسەبىندە قازاقستان ءبىرىنشى ورىن العانىن مالىمدەدى، دەپ حابارلايدى «ادىرنا» ءتىلشىسى.
ايتۋىنشا، كوشپەندىلەر ويىندارى جوعارى دەڭگەيدە ءوتىپ، ۇلكەن سپورتتىق مەرەكەمەن قورىتىندىلانعان.
الاگوزوۆ سپورتتىق باسەكەلەستىكتىڭ تەك جارىس الاڭىندا قالعانىن، ال ەكى ەلدىڭ جانكۇيەرلەرى اراسىندا ەشقانداي تۇسىنىسپەۋشىلىك بولماعانىن اتاپ ءوتتى.
ول مەدالدار ەسەبىنە قاتىستى جاعدايعا دا تۇسىنىكتەمە بەردى. ونىڭ ايتۋىنشا، جالعىز تەحنيكالىق ايىرماشىلىق مەدالداردى ەسەپتەۋ كەزىندە بولعان.
بۇگىن ۇيىمداستىرۋ كوميتەتى قازاقستاننىڭ ءۇش سپورتشىسىنىڭ ارقايسىسى جەڭىپ العان مەدالداردى جەكە ەسەپكە الۋ تۋرالى شەشىم قابىلداعان. قايتا ەسەپتەۋ ناتيجەسىندە جالپى كوماندالىق ەسەپتە ءبىرىنشى ورىندى قازاقستان يەلەنگەن.
«قازاق باۋىرلارىمىزدى جەڭىسىمەن قۇتتىقتايمىز»، — دەدى پرەزيدەنتتىڭ ءباسپاسوز حاتشىسى.
ول قىرعىزستان سپورتشىلارىنىڭ دا لايىقتى ونەر كورسەتىپ، وزدەرىنىڭ كۇشى مەن شەبەرلىگىن تانىتقانىن ايتتى.
الاگوزوۆتىڭ ناقتىلاۋىنشا، مەدالدار ەسەبى — جارىستىڭ ءبىر عانا قۇرامداس بولىگى. ول ويىنداردىڭ باستى ناتيجەسى جارىستاردىڭ ءوزارا قۇرمەت پەن ادال باسەكەلەستىك جاعدايىندا ءوتۋى، سونداي-اق قىرعىز جانە قازاق حالىقتارىنىڭ بىرلىگىن كورسەتۋى بولعانىن اتاپ ءوتتى.
ەسكە سالايىق، VI دۇنيەجۇزىلىك كوشپەندىلەر ويىندارى قىرعىزستاندا 31 تامىز بەن 6 قىركۇيەك ارالىعىندا وتكەن ەدى.
بۇعان دەيىن قىرعىزستان تاراپى جارىستاردا رەسمي مەدالدىق جانە جالپىكوماندالىق ەسەپ جۇرگىزىلمەيتىنىن مالىمدەگەن.
