Shymkenttik oqýshy, "aýzyn ashsa, júregi kórinetin" jetkinshek Pavel anasynyń túski asqa dep bergen tıyn-tebenine makaron satyp alyp, Túrkııada zardap shekkenderge joldady. Kishkentaı júregimen alystaǵy baýyrǵa adal qol sozǵan oqýshynyń áreketi dúıim jurttiń kózine jas úıirdi, dep habarlaıdy "Adyrna" ulttyq portaly.
Igilikti is jolyna túsken jetkinshektiń aıryqsha oqıǵasyn "Dobrıakı Shymkenta" eriktiler klýby habarlady.
Klýb músheleri qaptap-jelimdeı qoraptardy esep úshin vıdeoǵa túsirip jatady. Kenet sary bala Pavel kirip keledi. Sómkesinen makarondardy shyǵara bastaıdy. Ol anasynyń túski asqa dep bergen aqshasyna makaron satyp alyp, Túrkııaǵa berip jibergisi kelgenin aıtqan.
Jaqsylyq jasaý jolynda oqýshy sabaqtan keshigip qalǵan. Bir ózi eriktiler klýby ornalasqan ǵımaraty áleýmettik jeli arqyly taýyp barǵan. Buǵan qatysty eriktiler uıymynyń ókili:
"Mundaı alǵash ret bolyp tur. Jelimdeıtin qoraptardy vıdeoǵa túsirip, topqa jibergim kelgen. Osy kezde ol kirip keldi, aty Pavel eken, 4-mekteptiń 5 "z" synybynda oqıdy. Paveldiń ata-anasy, muny kórip otyrsańyzdar, uldaryńyzdy maqtan tutyńyzdar. Ol túski as ishpeı, kómektesip, qaıyrymdylyq jasaǵysy keldi. Ol anasy túski asqa dep bergen aqshaǵa makaron satyp alǵan. Qoımanyń mekenjaıyn Instagramnan tapqan. Úıinen bizge deıin jaıaý kelipti. Birinshi sabaqqa keshigip qalǵan. Oǵan muǵalimderi uryspaıdy dep úmittenemiz", - dep jazdy.
Jaqsylyqpen kógerip, meıirimge, adamgershilikke qushtarlyq tanytqan jetkinshektiń esimi kóptiń jadynda jazylary anyq. Balanyń ata-anasyna "asyl tárbıeniń jemisi", "naǵyz tárbıe" dep alǵys jaýdyryp jatqandar kóp. Álemdi meıirim qutqarady.
"Adyrna" ulttyq portaly
