Aqmola oblysynda týǵan 20 mıllıonynshy balanyń birine 2 mln teńgeniń sertıfıkaty tabys etildi. Aımaq basshysy perzenthanaǵa baryp, sábıdiń ata-anasyn quttyqtady. Bul týraly oblys ákiminiń baspasóz qyzmeti málimdedi, dep habarlaıdy “Adyrna” ulttyq portaly.
Sábı Dınara men Aıdar Isenovtar otbasynda dúnıege kelgen. Dárigerlerdiń aıtýynsha, ananyń júktiligi qalypty ótken, qazirgi ýaqytta náreste men ananyń jaǵdaıy qanaǵattanarlyq.
Aqmola oblysynyń ákimi Marat Ahmetjanov el Prezıdentiniń atynan otbasyn sábıdiń dúnıege kelýimen quttyqtady.
Búgin memleket basshysy Qasym-Jomart Toqaev halyqty elimizdiń jıyrma mıllıonynshy turǵynynyń dúnıege kelýimen quttyqtady! Osynaý ataýly oqıǵaǵa biz de qýanyshtymyz. Elimizdiń jıyrma mıllıonynshy turǵyny bolyp ómir esigin ashqan perzenttiń Aqmola oblysynyń erekshe bir kórkem, kórikti, sulý jeri Býrabaıda dúnıege kelýi biz úshin tipti erekshe syı! Bala qaı jerde týsa da, búkil Qazaqstan halqynyń qýanyshy. Memleket densaýlyq saqtaý men bilimge kóp kóńil bóledi, bizdiń balalarymyz jaqsy bilim men medıınalyq kómek ala otyryp, qolaıly ortada ósýi kerek. Bul Otanymyzdyń turaqtylyǵy men órkendeýiniń jarqyn aıǵaǵy, - dep atap ótti Marat Ahmetjanov.
Jańa týǵan sábıdiń ata-anasy qýanyshyna ortaqtasqan oblys basshylyǵyna alǵysyn bildirdi.
Bizdiń otbasymyz úshin bul kútpegen jáne óte qýanyshty kún! Bul bizdiń ekinshi balamyz! Barshańyzǵa beıbit aspan tileımin! Biz óz tarapymyzdan balalarymyzdyń baqytty otbasynda jáne beıbit memlekette ósýine yqpal etemiz, - dedi balanyń ákesi Aıdar Isenov.
Qazirgi ýaqytta ana sábıimen birge «Avıenna – Býrabaı» JShS ana men bala bólimshesinde jatyr.
