Qyzylorda oblysynyŋ Aral audanynda uchaskelık polisiia inspektory qaza tapty, dep habarlaidy “Adyrna” tılşısı.
Oqiǧa 1 qyrküiekke qaraǧan tünı bolǧan.
Oblystyq polisiia departamentınıŋ mälımetınşe, polisiia qyzmetkerıne tūrmystyq janjal kezınde dene jaraqattary keltırılgen. Ol alǧan jaraqattarynan köz jūmǧan. Oqiǧa kezınde polisei eŋbek demalysynda bolǧan.
Qyzmetkerdıŋ denesı jeke tūrǧyn üidıŋ aulasyndaǧy garajdan tabylǧan. Marqūm 1988 jyly tuǧan.
Polisiia küdıktınıŋ jeke basyn anyqtaǧan. Qazır ony ūstau boiynşa jedel şaralar jürgızılıp jatyr.
Vedomstvo mälımetınşe, küdıktı būǧan deiın marqūm uchaskelık inspektor tarapynan tūrmystyq qūqyq būzuşylyqtar üşın bırneşe ret äkımşılık jauapkerşılıkke tartylǧan. Oǧan qatysty qorǧau nūsqamalary da şyǧarylǧan.
Atalǧan faktı boiynşa qylmystyq ıs qozǧalyp, sotqa deiıngı tergeu bastaldy. Oqiǧanyŋ barlyq män-jaiy anyqtalyp jatyr.
