Demalys künıne qaramastan, taŋnan berı sailau uchaskelerıne keluşıler legı tolastar emes. Dauys beru üderısı bırtındep barşaǧa ortaq ülken oqiǧanyŋ sipatyna ie bolyp keledı: bır jerde taŋ batamen bastalsa, endı bır jerde sailauşylardy dästürlı şaşumen qarsy alyp jatyr.
Al keibır tūrǧyndar taŋǧy jügıruden, veloşeruden nemese futbol jattyǧuynan keiın dauys beruge barǧan. Keibır uchaskelerde taŋǧy saǧat 7:00-de, aşylǧan sätten bastap kezek jinala bastaǧan. Ortalyq sailau komissiiasynyŋ mälımetınşe, osy uaqytqa deiın elımızdıŋ 20 öŋırınde 10 363 uchaske jūmysyn bastady. Taǧy 79 uchaske şetelde qūryldy.
Öŋırlerden taraǧan kadrlarǧa qaraǧanda, qazaqstandyqtar sailau künıne sporttyq, köterıŋkı ärı kei tūsta tosyn körınısterımen erekşe köŋıl küi syilap jatyr.
Mäselen, Astanada bır boijetken dauys beruge üi halatymen jäne adamǧa ūqsas robottyŋ süiemeldeuımen keldı. Al elordalyq jügıruşıler taŋǧy jügıruın sailau uchaskesınıŋ aldynda aiaqtady. Aqtöbede sailau uchaskesıne bır mezette 20 velosipedşı keldı.
Almatydaǧy sailauǧa tıptı «Messi» men «Ronaldu» da keldı. Ras, olar boitūmar keiıpkerlerdıŋ kostiumın kigen edı. Dauys beru aldynda erekşe futbol duetı №294 sailau uchaskesınıŋ maŋynda doppen jattyǧu jasap, ainalasyna äp-sätte körermen jinady.
Bır jerde dauys beru künı batamen bastalsa, endı bır jerde taŋǧy jügırumen, futbolmen nemese veloşerumen jalǧasty. Uchaskelerde alǧaş ret dauys berıp jatqandardy qarsy alyp, alǧaşqy sailauşylardy qūttyqtap jatyr.
Almatyda Qūryltai esımdı sailauşy bügıngı künnıŋ eŋ simvolikalyq oqiǧalarynyŋ bırınıŋ basty keiıpkerıne ainaldy. Qala tūrǧyny Qūryltaidyŋ alǧaşqy sailauyna qatysu üşın sailau uchaskesıne keldı.
Būl jeksenbılık taŋnyŋ eŋ basty körınısı – adamdardyŋ sailau uchaskelerıne älı de aǧylyp jatqany. Demalys künı endı ǧana bastalǧanymen, eldegı sailau uchaskelerınde qazırdıŋ özınde halyq qarasy qalyŋ.
