Top baiqauşylary sailau künı Qazaqstannyŋ 11 qalasyndaǧy myŋnan astam sailau uchaskesınde dauys beru prosesıne monitoring jürgızgen. Baqylaudyŋ mūndai keŋ auqymdy deŋgeiı elımızdıŋ ärtürlı öŋırlerındegı sailau barysyna jan-jaqty ärı obektivtı baǧa beruge mümkındık berdı deidı «Halyq ünı» ökılderı.
Qozǧalystyŋ negızgı ştaby Almaty qalasynda ornalasqan. Sonymen qatar, «Halyq ünı» qozǧalysynyŋ qoldauşylary men baqylauşylar jelısı elımızdıŋ bırqatar öŋırın qamtydy. Baqylau jūmystary Almaty, Astana, Şymkent, Türkıstan, Qyzylorda, Aqtöbe, Oral, Semei, Taraz, Qonaev jäne Taldyqorǧan qalalarynda jürgızıldı.
Baqylau missiiasyna daiyndyq barysynda 11 qalada myŋnan astam azamat elektoraldyq baqylau ädısterı boiynşa arnaiy oqytudan öttı. Baqylauşylardy qoǧamdyq-saiasi prosester salasyndaǧy täjıribelı sarapşylar — saiasattanuşy Dos Köşım, sarapşy jäne baspager Baqytjan Būqarbai, jurnalist Ermūrat Bapi jäne qoǧam qairatkerı Beknūr Kisikov daiarlady. Saiasi keŋes beru boiynşa sarapşy Nūrgeldı Äbdıǧani men saiasattanuşy Nūrbolat Nyşanbai qatysqan.
Oqytu baǧdarlamasynyŋ qorytyndysy boiynşa daiyndyqtan ötken azamattardyŋ arasynan baqylauşylar ırıktelıp, olarǧa sailau uchaskelerınde baqylau jürgızuge arnalǧan resmi joldamalar berılgen.
«Halyq ünı» qozǧalysy baiqauşylary dauys beru künı uchaskelerde taŋerteŋnen bastap barlyq sailau räsımderı aiaqtalǧanǧa deiın jūmys ıstep, azamattyq baqylaudy barynşa sapaly jäne jan-jaqty jürgızuge küş saldy.
Top müşelerı uchaskelerde dauys berudıŋ negızgı räsımderı qoldanystaǧy zaŋnama talaptaryna tolyq säikes öttı deidı. Ssailauşylardyŋ belsendılıgı joǧary bolǧanyn atap öttı. «Halyq ünı» sailau prosesınıŋ barynşa şynaiy, ädıl ötkenın aitty.
Baqylau barysynda kezdesken kışıgırım zaŋ būzuşylyqtar boiynşa baqylauşylar tiıstı aktıler men hattamalardy räsımdegen. Qazırgı uaqytta alynǧan aqparatty jinaqtau, jüieleu jäne qosymşa tekseru jūmystary jalǧasuda deidı. Jaqyn uaqytta barlyq materialdar qorytyndylanyp, saraptama jasalynbaq. «Halyq ünı» baiqauşylary baqylau jūmystary men äzırlenetın ūsynystar sailau prosesın odan ärı jetıldıruge, azamattardyŋ sailau instituttaryna degen senımın nyǧaituǧa yqpal etedı degen senım bıldırdı.
