Almaty oblysynda soŋǧy üş jylda 50-ge juyq auyldyŋ köşelerıne alǧaş ret asfalt töseldı. Jaŋarǧan köşelerdıŋ jalpy ūzyndyǧy 66,5 şaqyrymdy qūraidy. Būl jūmystarǧa jergılıktı biudjetten 1,64 mlrd teŋgege juyq qarjy bölındı, dep habarlaidy Almaty oblysy äkımınıŋ baspasöz qyzmetı.
Jaŋa joldar Eŋbekşıqazaq audanyndaǧy Saimasai, Aqtoǧan, Amangeldı, Almaly, Qoram jäne Satai auyldarynda, Ūiǧyr audanyndaǧy Şonjy, Rahat, Aqtam auyldarynda, Talǧar audanyndaǧy Bereke, Tūzdybastau, Töŋkerıs, Qyzyltu, Jaŋalyq jäne Tüzusai auyldarynda, Jambyl audanyndaǧy Qarǧaly, Ülken, Şien, Berıktas, Şolaqqarǧaly, Üŋgırtas jäne Yntymaq auyldarynda, Ile audanyndaǧy Baikent, Jäpek batyr, Kazsik, Aqsai, Äli auyldarynda, sondai-aq Balqaş, Kegen, Raiymbek jäne Qarasai audandaryndaǧy auyldardyŋ bırqatar köşesıne töseldı. Būl eldı mekenderdıŋ keibırınde tūrǧyndar asfalt joldy 30 jyldan astam uaqyt kütken. Joldyŋ jaŋaruy atalǧan eldı mekenderdegı 50 myŋnan astam tūrǧynnyŋ kündelıktı qatynasyn jaqsartty.
«Biyl auylymyzǧa alǧaş ret asfalt töselıp, köpten kütken mäselemız şeşıldı. Jaŋbyr jausa, joldyŋ jaǧdaiy qiyndap, kölıkpen jüru de, jaiau jürıp-tūru da oŋai bolmaityn. Endı mıne, köpten kütken jolymyzǧa asfalt töseldı. Būl – auyl tūrǧyndary üşın ülken quanyş. Osy mäselenı şeşuge atsalysqan azamattarǧa alǧysymyzdy aitamyz», – dedı Jambyl audany Üŋgırtas auylynyŋ tūrǧyny Beibıt Esımbekov.
Jol mäselesı äsırese halqy köp eldı mekender üşın maŋyzdy. Mäselen, Ūiǧyr audanyndaǧy Şonjy auylynda 20 myŋnan astam tūrǧyn bar. Biyl mūnda būryn asfalt bolmaǧan taǧy alty köşege alǧaş ret jol töseledı. Jalpy, oblystaǧy eldı mekenderdıŋ basym bölıgınde köşeler asfalttalǧan. Degenmen, keibır auyldarda qiyrşyq tas pen şaǧal töselgen joldar älı de jetkılıktı. Olardy da asfalttau jūmystary jalǧasady.
«2026-2027 jyldary oblysta taǧy 100 şaqyrymnan astam köşege asfalt töseu josparlanǧan. Josparǧa Eŋbekşıqazaq, Ūiǧyr, Ile, Jambyl, Qarasai, Kegen, Raiymbek, Balqaş jäne basqa da audandardaǧy eldı mekenderdıŋ köşelerı engızılgen. Iаǧni aldaǧy kezeŋde de būǧan deiın asfalt töselmegen köşelerge jol salu jalǧasyn tabady. Būl jūmystarǧa qarastyrylǧan qarjy kölemı 4,67 mlrd teŋgege juyq», – dedı Almaty oblysynyŋ Jolauşylar kölıgı jäne avtomobil joldary basqarmasynyŋ basşysy Ermek Baimūhambetov.
Joldardyŋ jaŋaruy auyl tūrǧyndarynyŋ kündelıktı jürıp-tūruyn jeŋıldettı. Būǧan deiın kölık jüruı qiyndaǧan köşelerde qatynas jaqsaryp, mektepterge, medisinalyq mekemelerge jäne audan ortalyqtaryna jetu uaqyty orta eseppen 10 - 20 minutqa qysqarǧan.
