Foto: DSM
Almatydaǧy därıgerler jasy jetpıske taiaǧan äjenıŋ ışınen salmaǧy 25 kelıden asatan qaterlı ısıktı alu üşın ūzaq ota jasaǧan. Densaulyq saqtau ministrlıgınıŋ baspasöz qyzmetı ısıktıŋ suretın körsetıp, der kezınde därıgerge barmaudyŋ saldary qandai bolatynyn eskertken, dep habarlaidy "Adyrna".
«Därıgerler nauqastyŋ ömırın saqtau üşın bıregei ota jasady. Nauqastyŋ ışınde bırneşe aidan berı ısık ösıp jatqan. Syrtqy közge qaraǧanda aiaǧy auyr äiel siiaqty körıngen. Salmaǧy şamamen 25 kelı bolatyn ısık bırneşe aidan berı ösıp jatsa da äiel medisinalyq kömekke jügınbegen jäne dästürlı emes ädıstermen emdelgen», - dep habarlaidy Densaulyq saqtau ministrlıgı.
DSM-nyŋ mälımetıne süiensek, 1957 jyly tuǧan nauqas şamamen alty aptadan ekı ai aralaǧynda auyrǧan.
«Osy uaqyt ışınde ol jaqsaruǧa ümıttenıp, ärtürlı taǧamǧa qosylatyn biologiialyq belsendı qospalardy qabyldaǧan. Alaida, eşqandai nätije bolmaǧan - ısık tez öse bergen. Keiınırek tuystary aitqandai, äiel öz jaǧdaiyn jasyryp, tıptı qospalardy satyp alu üşın nesie alǧan. Tek jaǧdaiy naşarlaǧannan keiın ǧana nauqas Almaty onkologiialyq ortalyǧyna onkohirurgiia bölımınıŋ meŋgeruşısı Nūrlan Baltaevqa qaraldy. Kompiuterlık tomografiiany qosa alǧanda, tekseru kezınde ış quysy men jambas quysynda alyp ısık anyqtaldy. Isık 35 santimetrdı qūrap, ış quysyn tolyǧymen toltyryp, jambas quysyna deiın sozylǧan», - dep habarlaidy densaulyq saqtau ministrlıgı.
Därıgerler şamamen 2,5 saǧat ışınde ota jasap, ışperde artyndaǧy ısıktı äreŋ alǧan. Otany onkohirurgiia bölımınıŋ meŋgeruşısı Nūrlan Baltaev jäne onyŋ kömekşısı Ǧalym Sarmaş jasaǧan.
«Alynǧan ısıktıŋ salmaǧy şamamen 25 kilogrammdy qūrady. Därıgerler äieldıŋ diagnozyn, iaǧni, qaterlı ısıktı rastady. Qazır nauqas himioterapiiadan ötıp jatyr», - dep habarlaidy DSM.
