Qoja Ahmet Iаsaui atyndaǧy Halyqaralyq qazaq-türık universitetı jetı tomnan tūratyn qazaq-türık sözdıgın äzırleu jūmysyn aiaqtady, dep habarlaidy “Adyrna” tılşısı.
Joba türkıtanu salasyndaǧy auqymdy leksikografiialyq eŋbekterdıŋ bırıne ainaldy.
Universitet mälımetınşe, sözdıktı daiyndau jūmystary tört jylǧa sozylǧan. Zertteu jobasynyŋ negızgı maqsaty – türkı tılderın salystyra zertteu, olardyŋ ortaq tıldık erekşelıkterın zerdeleu jäne türkı älemınıŋ mädeni-tıldık mūrasyn saqtau.
Sözdıktı qūrastyru barysynda zertteuşıler qazaq ädebietınıŋ şamamen 1,5 myŋ şyǧarmasyn taldaǧan. Onyŋ ışınde 787 şyǧarma sözdıkke arnalǧan tıldık korpusty qalyptastyruǧa paidalanyldy.
Zertteu nätijesınde kölemı şamamen 30 million sözden tūratyn auqymdy tıldık korpus jasalǧan. Jetı tomdyq basylym qazaq jäne türık tılderınıŋ leksikalyq qoryn salystyra zertteuge mümkındık beretın maŋyzdy ǧylymi eŋbek retınde ūsynyldy.
