AQSh-tyń saılanǵan prezıdenti Donald Tramp Aıova shtatynyń bedeldi Des Moines Register gazetine, onyń bas kompanııasyna jáne burynǵy saýalnama júrgizýshi Dj. Enn Zelerge qarsy sot isin bastady, dep habarlaıdy "Adyrna" ulttyq portaly VVS-ge siltep.
Tramp olardy 2024 jylǵy prezıdenttik saılaý aldyndaǵy «saılaýǵa óreskel aralasý» áreketi úshin aıyptap otyr.
2 qarashada jarııalanǵan saýalnamada Tramptyń Aıova shtatynda Kamala Harrıske birneshe paıyzdyq kórsetkish boıynsha utylyp jatqanyn kórsetken. Bul shtatta Tramp 2016 jáne 2020 jyldary aıqyn jeńiske jetken bolatyn. Saýalnama avtory Dj. Enn Zelerdiń zertteýleri burynnan joǵary bedelge ıe bolǵan. Biraq Tramp bul jolǵy nátıjelerdi «qasaqana burmalaýshylyq» dep atady.
Tramptyń aıtýynsha, saýalnama nátıjeleri «qoǵamdyq pikirdi manıpýlıaııalaý jáne saılaý nátıjelerine áser etý úshin» jasalǵan. Degenmen, saılaý kúni Tramp Aıova shtatynda 13 paıyzdyq artyqshylyqpen jeńiske jetti.
Sotta Tramp Des Moines Register basylymynan qarjylyq ótemaqy tóleýdi jáne saýalnama nátıjeleriniń barlyq ádisnamalyq derekterin ashýdy talap etti.
«Meniń oıymsha, bul tek burmalaý emes, tikeleı alaıaqtyq pen saılaýǵa aralasý. Mundaı jaǵdaılarmen kúresý kerek», — dedi Tramp baspasóz máslıhatynda.
Gazet ókili Lark-Marı Anton saýalnama ádisnamasy tolyq jarııalanǵanyn jáne sońǵy nátıjelerdiń Tramptyń jeńisin dál kórsetpegenin moıyndady. Ol basylymnyń is-áreketin zańdy dep sanap, sot talaptarynyń oryndalmaýyn kútetinin aıtty.
Bul oqıǵa Tramptyń AQSh medıasyna qatysty synshyl kózqarasynyń jalǵasy retinde qarastyrylýda. Buǵan deıin ABC News telearnasy Trampqa qatysty málimdemesi úshin keshirim surap, onyń qory men bolashaq mýzeıine 15 mln dollar qaıyrymdylyq tóleýge kelisken.
Aıta keteıik, Tramptyń AQSh medıasyna qarsy bul áreketi onyń saılaýdaǵy jeńisinen keıin de jalǵasyp otyr.
