AQŞ äskerı särsenbı künı keşke İranǧa qarsy jaŋa äue soqqylaryn jasaǧanyn mälımdedı. Būl el prezidentı Donald Tramptyŋ soǧysty toqtatu turaly kelısım merzımı aiaqtaldy dep sanaitynyn aitqannan keiın boldy, dep habarlaidy «Adyrna» tılşısı.
Şabuyldar almasuy Ankarada ötetın NATO sammitı qarsaŋynda bastaldy. Äskeri şielenıske İrannyŋ Ormūz būǧazyndaǧy sauda kemelerıne jasaǧan şabuyldary sebep bolǧan.
«Bas qolbasşynyŋ tapsyrmasymen AQŞ Ortalyq qolbasşylyǧy İrannyŋ Ormūz būǧazyndaǧy keme qatynasynyŋ erkındıgıne qauıp töndıru mümkındıgın odan ärı älsıretu üşın qosymşa soqqylar jasai bastady», – delıngen qolbasşylyqtyŋ X äleumettık jelısındegı habarlamasynda.
Al Aq üi basşysy būl İrannyŋ kemelerdı bombalauyna berılgen jauap ekenın jetkızdı.
«Eger mūndai äreket qaitalansa, saldary äldeqaida auyr bolady!» – dep jazdy Tramp Truth Social jelısınde.
AQŞ äskerı jaŋa soqqylar tolqyny aiaqtalǧanyn habarlady. Mälımetke säikes, şabuyldar äue qorǧanysy jüielerıne, zymyran jäne dron qoimalaryna, äskeri-teŋız nysandaryna jäne İran jaǧalauy boiyndaǧy logistikalyq infraqūrylymǧa tiesılı jalpy 90 nysanǧa baǧyttalǧan.
İrannyŋ IRNA memlekettık aqparat agenttıgı Ormūz būǧazy maŋyndaǧy bırneşe qalada, sonyŋ ışınde eldıŋ eŋ ırı porty ornalasqan Bender-Abbas qalasynda jarylystar bolǧanyn habarlady. Būl qalada İran äskeri-teŋız küşterı men İslam revoliusiiasy saqşylary korpusynyŋ maŋyzdy nysandary ornalasqan.
Şabuyldar Chabahar, Konarak jäne Sirik qalalaryn, sondai-aq Lavan aralyn da qamtyǧan. Chabahardyŋ keibır audandarynda elektr energiiasy öşken. IRIB memlekettık telearnasynyŋ mälımetınşe, qaladaǧy ekı ailaq pen teŋız dispetcherlık mūnarasy şabuylǧa ūşyraǧan.
Press TV telearnasy İrannyŋ oŋtüstık-şyǧysyndaǧy İranşahr qalasynyŋ äuejaiyndaǧy terminal ǧimaraty men ūşu-qonu jolaǧynda jarylystar bolǧanyn habarlady. IRNA mälımetınşe, äuejaida bır ört söndıruşı qaza tauyp, äue qozǧalysyn basqaru ǧimaraty men meteorologiialyq stansa zaqymdanǧan.
Tasnim agenttıgınıŋ habarlauynşa, eldıŋ soltüstıgınde temırjol köpırı zaqymdalǧan. Al Fars agenttıgı Buşer qalasynda da jarylystar estılgenın mälımdedı. Būl portty qalada Reseidıŋ qatysuymen salynǧan atom elektr stansasy ornalasqan. İrannyŋ Joǧary ūlttyq qauıpsızdık keŋesıne jaqyn Nournews agenttıgı stansanyŋ zardap şekpegenın habarlady.
